هالة أنور تكشف سر غيابها عن الوسط الفني لمدة 20 عاما

ياسمين حمادة 22 فبراير 2023 | 11:02 مساءً

هالة أنور تظهر بعد غياب استمر لأكثر من 20 عامًا، وتكشف سبب غيابها وابتعادها عن الوسط الفني طوال السنوات الماضية، قائلًا: «أما خدت قرار ابتعادي عن الفن كان سني صغير أوي».

تصريحات هالة أنور

قالت هالة أنور في تصريحات تلفزيونية لها، إن قرار ابتعادها عن الفن بحكم السن الصغير كان خطأ، معلقة: «بدأت وأنا عندي سنتين ونص، أنا كنت شايفة نفسي عملت كل حاجة استعراض وغناء وتمثيل أكتر من 476 عمل».

واستكملت الفنانة هالة أنور قائلة: «خدت قرار الابتعاد وأنا في ثانوية عامة، اتخطبت وأنا عندي 16 سنة لحد من الوسط الفني مش هينفع أقول هو مين لأن له زوجة وأولاد دلوقتي».

هالة أنور

ابتعاد هالة أنور عن الوسط الفني

وقالت أيضًا: «هو اللي أقنعني أبعد عن الفن لأني عملت كل حاجة وفيه حياة وبيت، وبعد كام شهر كان في اختلاف وجهات النظر وانفصلنا، وكل اللي حواليا كانوا ضدي لما خدت خطوة الخطوبة وترك الفن واتحاربت كتير وقتها والدتي زعلت جدًا وحاولت ترجعني للفن».

وأضافت الفنانة هالة أنور في حديثها: «اتكسفت أقول إني فسخت الخطوبة وعايزة أرجع للفن، والكاتب الراحل أسامة أنور عكاشة كان متبنيني، وكان أول واحد معارضني في ابتعادي عن الفن، وحتى بعد زواجي كان بيقنعني بالرجوع، أما زوجي مطلبش مني أبعد عن الفن، أنا اللي بعدت، وهو مكنش عنده اعتراض لما رجعت الفن تاني في التسعينيات».

زواج هالة أنور

وفيما يخص زواجها وابتعادها عن الفن، قالت: «بعد 7 سنين زواج رجعت للفن تاني وكنت بقول للقريبين مني إني عايزة أرجع للفن، وأول حد عرف إني رجعت كان الأستاذ رياض العريان الله يرحمه وعملت معاه مسلسل أفواه وأرانب، وصورته في اليونان، أما مخرج سهرة ابتسامة الجيوكندا، قالي أنا كان حلمي من وأنا مساعد مخرج إني أبقى مخرج علشان أشتغل معاكي».

وتابعت: «اختفيت 20 سنة عن المجال لأني ملقتش مكان، وطبعي من وأنا صغيرة بتكسف جدًا ومقدرش أروح شركات الإنتاج وأقول عايزة اشتغل، والفنانة عبلة كامل قالتلي من كتر حبي في أدوارك أنا بغير منك، وهي إنسانة جميلة دوبت التلج بيني وبينها لأني بتكسف».

عودة هالة أنور

وأشارت هالة أنور إلى أن آخر أعمالها كان مشاركتها في بطولة مسلسل ضل راجل مع ياسر جلال في رمضان، مضيفة: «جاتلي مكالمة منه اتخضيت لما لقيت اسمه وكنت فاكرة أن الأسماء متشابهة، وقولتله أنت لسة فاكرني؟ قالي في حاجات مينفعش تتنسي وأنتي عملتي مسرحية مع بابا وقالي تفاصيلها، وياسر جلال ابن أصول أوي وفيه جدعنة ولاد البلد».

واختتمت كلامها: «لما كنت بشوف دور في عمل ونفسي أعمله كانت دموعي بتنزل وبكلم نفسي أمام المراية»، موضحة أن الحجاب ليس عائقًا عن مسيرتها الفنية، قائلة: «كل مجال فيه محجبات أو غير محجبات، وفيه نجمات كبار لما بيحبوا يعلموا حاجة مختلفة بيلبسوا حجاب وأنا أرفض الباروكة».

هالة أنور