هشام جمال يكشف لأول مرة تفاصيل وعكته الصحية في شهر العسل

روى الفنان هشام جمال تفاصيل مروره هو وزوجته ليلى بأزمة صحية خلال شهر العسل، موضحًا أن ما حدث لهما كان مفاجئًا وصعبًا في نفس الوقت.

وقال هشام: "اللي هنقوله دا أنا مش بهزر، ومفيش حد من أهلنا ولا أصحابنا يعرف، إحنا اتفقنا إننا هنقول بس هما ميزعلوش عشان مكناش عايزين نخضهم، حصلت حاجة دمها تقيل شوية".

وأضاف أنهما تناولا وجبة من أحد المطاعم أمام الفندق الذي كانا يقيمان به في أمريكا، وبعد ساعات قليلة بدأت تظهر عليهما أعراض تعب شديد، حيث أوضح: "أنا أكلت 3/4 الساندويتش وليلى ربع، وبعدها حسّيت بوجع في بطني بيزيد بشكل مش طبيعي، زي السكاكين، ومع الوقت اكتشفت إن ليلى كمان تعبانة بس كانت بتحاول متبينش".

وتابع هشام جمال: "فكرت أنزل المستشفى من غير ما أصحيها، بس قلت ماينفعش أسيبها لوحدها، ولما صحيتها قالتلي إنها كمان تعبانة، نزلنا مع بعض على المستشفى، وهناك الأطباء قالوا إن السبب تسمم أكل، وأدونا علاج وساعات وبدأنا نحس بتحسن بسيط".

واستكمل حديثه قائلاً: "كان عندنا طيارة بعدها بوقت قصير، جمعنا حاجتنا بسرعة وجرينا عشان نلحقها وإحنا لسه مش قادرين نقف على رجلينا، ولحقناها قبل الإقلاع بـ10 دقايق والحمد لله عدت على خير، ومقولناش لحد عن الموضوع دا غير دلوقتي".