هند عبدالحليم: بدأت بمشهدين مع غادة عبدالرازق وأحضر لميني ألبوم قريبا

تحدثت الفنانة هند عبدالحليم عن أسرار من حياتها الشخصية، ومفاجآت لأول مرة عنها وعن أعمالها الجديدة.

قالت هند عبدالحليم عبر تصريحات إذاعية: «في حاجات كتير الناس متعرفهاش عني، زي حبي للغناء والمسرح من وأنا صغيرة، وسعيدة إني بحقق أحلامي المؤجلة وبقيت حاليًا ممثلة ومغنية، وبحب الاتنين جدًا، وبحب أرقص، وبحب كمان كل ما له علاقة بالفن».

وتابعت: «كان عندي 5 سنين لما روحت قلت لماما إني بعرف أعزف، وأول ما بابا رجع من السفر جاب لي أورج هدية عيد ميلادي وكنت بحب أغني من وأنا صغيرة، واكتشفت عندي ملكة بعرف أحفظ وأغني الأغاني على طول، والدتي كانت بتستغرب لما تشغل الأغنية وأحفظها بسرعة وأغني معاها».

وعن بداياتها بالدراما، قالت هند عبدالحليم: «أول مسلسل ليا كان (الكابوس) مع النجمة غادة عبدالرازق، وكان دوري مشهدين، وكنت خايفة أوي، بس هي كانت داعمة ليا، لحد ما اتعلمت واكتسبت خبرات واشتغلت مع النجمة يسرا في مسلسل فوق مستوي الشبهات وكان ليا الشرف إني أشتغل مع النجوم اللي فيه بقيادة المخرج هاني خليفة، اللي علمني كتير في المشروع ده».

واستكملت: «التعاون مع الموسيقار هاني شنودة محطة مهمة أوي في حياتي، وليا الشرف إني طلعت من عنده متعلمة حاجات كتير، ولو سمع الأغاني الجديدة بتاعتي كانت هتعجبه ود. إيمان يونس علمتني حاجات كتير في الـ Vocalis والغناء».

واختتمت هند عبدالحليم: «عايزة أعمل الأيام الجاية حاجات كتير، حفلات وألبوم غنائي وسينما، وحابة استكشف وأجرب، لأنها رحلتي وأتمنى الشغل يعجب الناس، وألاقي الحاجة اللي لايقة عليا والناس تحبني فيها وحاليًا عندي 4 أغاني، وممكن قريب يبقى فيه ميني ألبوم».