أب محروم من نجله منذ 6 سنوات: طليقتي باعت الشقة وزوجت أخوها.. وضربوني أمام ابني

أكد أحمد، الأب المحروم من ابنه منذ أكثر من 6 سنوات بسبب الطلاق، أنه يعاني منذ حرمانه من ابنه، موضحًا أن المشكلات بينه وبين زوجته كانت كثيرة حتى أثناء الزواج.

وقال خلال لقائه مع الإعلامية نهال طايل في برنامج «تفاصيل» المذاع على قناة «صدى البلد»: «طلقتها مرة ورديتها بعد 8 شهور، وقلت إني لازم أكرمها عشان تخف المشاكل معايا عشان خاطر ابننا الوحيد».

وأضاف أنه اشترى لها شقة، وبعد شهرين و12 يومًا تم الانفصال الثاني بينهما، واستحالت الحياة بينهما، موضحًا: «إحنا كنا قاعدين في أكتوبر وأنا أصلي من بني سويف، وتعرفنا على بعض بحكم الجيرة لأننا كنا جيران».

وأوضح أن والدها كتب عقد اتفاق ودي لنفقة ابنه، وبعد 4 شهور من الطلاق تزوجت، قائلًا: «لقيت محكمة الأسرة بعتالي إني عليّ حكم نفقة، أنا مش عارف ليه أنا محروم من ابني وابني محروم من أخوه اللي عنده 6 شهور».

وأشار إلى أنها لم تكن تريد الطلاق، وأن كثرة المشكلات مع تدخل أطراف خارجية كانت السبب في قراره، مضيفًا: «هي كانت بتتصل في كل مشكلة بأخوها ووالدتها وابن عمها».

وتابع: «لما بتجيب أهلها بقدرهم وأنا آخر واحد بتكلم، وهما اللي كانوا بيقولوا حقق علينا، وأنا سبب الطلاق أن أحد الجيران رن علي وقال لي: إنت فين؟ قلت له في الشغل، قال بقالنا ساعة بنخبط على زوجتك ومش موجودة وسايبة ابنك في البلكونة هيموت، وإحنا واقفين تحت البيت حاطين ملايات عشان الولد ما يقعش، وده كان سبب الطلاق الثاني، وأخدت كل الورق وراحت لوالدتها».

واستطرد: «بعد شهرين تفاجأت إن حد من عندهم بيقولي أقولك على سر عشان إنت راجل محترم، إن زوجتك باعت الشقة في شهر 12، يعني باعت الشقة اللي كانت مكتوبة باسم ابني، وباعت العربية، وأخدت 17 جرام ذهب من أخويا سلف عشان أكمل وأجيب الشقة».

وذكر أن لديه شهودًا على تفريطها في مال الطفل، قائلًا: «عشان تزوج أخوها اللي ضربني في النادي وكسر علي الكرسي عشان بشوف ابني، أنا ادّيتهم حقوقها كلها كاملة، أنا محروم من ابني ليه؟ أنا بقالي سنتين ما شوفتش ابني غير 3 مرات، ولما روحت آخر مرة ضربوني في النادي ومعايا الفيديو، وابني شافني وأنا بتهان وأتضرب قدامه».