أحمد الرافعي: سعيد بمهرجان بورسعيد.. وأتمنى أن يعرف الأهالي مهرجانهم السينمائي

أعرب الفنان أحمد الرافعي عن سعادته الكبيرة بتواجده في محافظة بورسعيد، مؤكدًا ارتباطه القوي بالمحافظة التي تحمل له العديد من الذكريات منذ طفولته، كما تحدث عن مهرجان بورسعيد السينمائي الجديد، متمنيًا له النجاح في دوراته المقبلة.

وأوضح أحمد الرافعي في لقاء خاص مع الإعلامية شيرين سليمان، ببرنامج «سبوت لايت»، المذاع على قناة صدى البلد قائلاً: «مبسوط دايمًا وأنا موجود بين أهالي بورسعيد، أخيرًا بورسعيد بقى ليها مهرجان سينما. بنتمنى إنه يكون مهرجان على قدر المحافظة، بنتمنى إن إن شاء الله الدورات اللي جاية أهالي بورسعيد يكون عندهم علم بالمهرجان ويعرفوا إن هما عندهم مهرجان سينما، عشان هما متفاجئين، أنا ملاحظ ده في الشوارع».

وأضاف أحمد الرافعي قائلاً: «إن شاء الله بإذن الله الدورات اللي جاية تكون أفضل من حيث التنظيم ومن حيث الأفلام والندوات، والأهم من حضور السينمائيين والمتخصصين، حضور هواة الفنون من أبناء المحافظة، وده هيحصل طبعًا زي ما قلنا لما يكون فيه جهد إعلامي يعرف أبناء المحافظة بوجود المهرجان والأفلام المعروضة فيه، علشان يجوا يشرفونا ويشوفوا الحاجات اللي بتتقدم».

وأشار الفنان أحمد الرافعي إلى علاقته الخاصة بمدينة بورسعيد، حيث يحرص على زيارتها بشكل مستمر، قائلاً: «من عاداتنا إن إحنا دايمًا يمكن ما يعديش شهر إلا لما بنيجي، أنا من هواة السمك، فمع كل موسم لنوع معين بيظهر أو يبقى هو ده المسيطر، فيلا يا جماعة السردين نزل، يلا يا جماعة الحنشات بدأت تظهر، الشبار الأخضر في الطريق، فبنبقى جايين نتغدى لكن في نفس الوقت بنحاول إن إحنا يكون فيه فرصة إنه نزور المتحف الحربي، نزور الأماكن المختلفة».

وتابع الرافعي حديثه عن ذكرياته مع المدينة قائلاً: «أنا كنت دايمًا باجي محافظة بورسعيد مع والدي وأنا في سن الخمس سنين والست سنين، وكانت المحافظة مختلفة كتير عن دلوقتي، لكن لازال في شوارع أنا ليا فيها ذكريات وكنت بمشيها مع والدي وأنا صغير، فحابب إن أمشي فيها مع أولادي وأمشي بين البورسعيدية نفسهم والتعامل معاهم ده في حد ذاته من زمان، من أول ما المركز الثقافي ده أول افتتاح ليه، أول عرض مسرحي اتعمل عليه، الحمد لله كنت مشارك فيه».

واختتم الفنان حديثه بالكشف عن أعماله السينمائية المقبلة، موضحًا أنه يواصل حاليًا تصوير أكثر من فيلم جديد، قائلاً: «بستأنف تصوير فيلم 'الساعة سبعة' أو 'المرج حلوان'، الاثنين اسم مؤقت، كليهما اسم مؤقت، الله أعلم الاسم اللي هيفضل هو إيه يعني، ولا زلت برضو بستأنف تصوير 'إيجي بست' إخراج مروان عبد المنعم وبطولة أحمد مالك ومروان بابلو وسلمى أبو ضيف، وفيلم 'الحارس' إخراج ياسر سامي وبطولة هاني سلامة».