أحمد سعد يكشف تطورات صادمة عن أزمته: سوء تنظيم والسيدة التونسية متشتمش ضيف

علق الفنان أحمد سعد على أزمة حفل تونس وخناقته مع منظمة الحفل، وقال: «أنا بحترم المرأة التونسية ولا عاش ولا كان اللي يغلط في المرأة التونسية وعندنا الفنانات التونسيات لما بيطلعوا يتكلموا إحنا بنسمع لهم وبنستفاد»؟

تصريحات أحمد سعد

قال أحمد سعد في تصريحات إذاعية له: «لكن اللي غلط في المرأة التونسية هو اللي عمل رمز السيدة التونسية في الأزمة دي.. السيدة التونسية متعملش الحاجات اللي حصلت.. السيدة التونسية متشتمش ضيف وتقوله إنت مش محترم.. أنا نزلت من باب الحفلة ملقتش العربية مستنياني وواحد صاحبي وصلني».

وتابع: «روحت ومكانش في بند في العقد إني أعمل لقاءات صحفية لأن مكانش في غرفة مخصصة للمؤتمر الصحفي وأنا جاي مهرجان قرطاج وهعمل وقتها مؤتمر صحفي دقيق ومنظم وأنا موعدتهاش إني أعمل لقاءات وعندي رسايل تثبت الكلام ده، وأنا بغني فوجئت براقصين طلعوا على المسرح».

أحمد سعد

حفل أحمد سعد في تونس

واستكمل الفنان أحمد سعد كاشفًا كواليس الأزمة وتطورات جديدة، قائلًا: «طبعًا معملناش بروفة ولا أي حاجة ومكانش في تناسق لحد ما طلبت من المنظمين ينزلوهم وأنا مش بحب أكسر بخاطر حد لكن أنا اتفاجئت بيهم وشكلهم كانوا أول مرة يطلعوا على المسرح، ودا شيء مهين لكل الأطراف».

وقال أيضًا: «ده بيدل على سوء التنظيم، ومحصلش إني سبت الحفلة بسبب ضعف الإقبال اللي حصل إنها جابت مطرب تاني مصري والطبيعي يغني قبلي عشان الناس جاية علشاني.. لكن خلتني أطلع قبله ودا اللي خلى الجمهور يمشي لأنه جاي علشاني، وبعدما خلصت الحفلة فوجئت إنها عازمة صحفيين وواقفة تقولهم إني مشيت».

وأضاف: «ومعملتش حوارات وأنا متفق على كدا فرجعت لها تاني علشان أقولهم بكل احترام السبب اللي خلاني معملش حوارات، فوجئت بيها بتهاجمني وكشفت أجري في الحفلة ودا مينفعش فقولتلها لو سمحتي اسكتي 3 مرات أنا ملتزم بالأخلاق ولم أسب ولم أقذف».

واختتم أحمد سعد: «احترامًا لما حد يتكلم مع صحفيين مينفعش تقاطعيني، وبعد ما أفشت أجري قولتلها أخرسي، أنا واثق في القضاء التونسي، ومقدرش أحصر المرأة التونسية في منظمة الحفل، المرأة التونسية هي النزاهة والصدق وكثيرة الاحترام وأنا أسمع لها وأستفيد منها.. وأشكر وزارة الثقافة التونسية على موقفها بعدما ألقت اللوم على منظمة الحفل اللي قالتلي إن الحفلة تبع الحكومة ودا طبعًا غلط».

أحمد سعد في تونس

أحمد سعد