أحمد موسى يوجه رسالة قاسية لـ إسماعيل هنية: أنت كداب معبر رفح مفتوح للمصابين

وجه الإعلامي أحمد موسى رسالة قاسية لـ إسماعيل هنية رئيس المكتب السياسي لحركة حماس بعد تصريحاته الأخيرة عن مصر وفتح معبر رفح وقال أحمد موسى أن هنية مش موجود في غزة ولا يعرف حاجة عنها وطالع يقولك افتحوا المعبر، معلقا «طب إحنا نعرف عن غزة اكتر منك».

رسالة قاسية لـ إسماعيل هنية

كشف أحمد موسى أن القضية الفلسطينية هي قضية كل العرب وليس قضية مصر وحدها، قائلا: استغربت الأيام اللي فاتت لما لقيت الناس بتتكلم وتحمل مصر المسئولية

وتابع خلال برنامج على مسئوليتي، المذاع على قناة صدى البلد، طرحت سؤال هي حماس لما أخدت قرار الحرب هل تشاورت مع حد وقالت هنحارب وحددت أهداف أيه وقالت هنوصل لأيه .. أبدًا.

وتابع: أن هناك من الأشقاء وقفوا أمام سفارة مصر في رام الله يشتموا مصر، وفي ناس تظاهروا لمهاجمة مصر عشان معبر رفح وإسماعيل هنية طلع اتكلم.

وأضاف الإعلامي أحمد موسى: كأن القضية الفلسطينية هي قضية مصرية، يا جماعة أنتو فاهمين الموضوع غلط، هناك 22 دولة عربية، صحيح مصر شايلة القضية من 1948 .

وقال الإعلامي أحمد موسى، إن إسماعيل هنية مش موجود في غزة ولا يعرف حاجة عنها وطالع يقولك افتحوا المعبر، معلقا «طب إحنا نعرف عن غزة اكتر منك».

فتح معبر رفح

وأردف: معبر رفح مش باب واحد، أقولك أنا الفكرة، لدينا البوابة المصرية والناحية التانية البوابة الفلسطينية، أما بتاعتنا إحنا شغالة على طول متقفلتش، والمغلقة هي البوابة الفلسطينية تحت سيطرة الاحتلال، وأنا بشرحلك عشان لما تتكلم تتكلم كلام مظبوط ومتعملش فتنة وتقول كلام مغلوط.

وواصل الإعلامي أحمد موسى أن مصر قلبا وقالبا مع الشعب الفلسطيني، وكلامك يا إسماعيل هنية ده يوحي أن مصر قفلت المعبر ولكن أنت كذاب يا حج إسماعيل هنية وعاوز تثير الناس.

وأردف: المشكلة فين يا حج إسماعيل، أقولك أنا المشكلة في غزة اللي هي تحت الاحتلال ولا أنت متعرفش ولا استقليت، وأكيد تعرف أن أمريكا وإسرائيل راصدين كل حاجة تتحرك من الناحية التانية.

واستطرد: متطلعش أنت وأسامة حمدان تقولوا افتحوا معبر رفح على البحري، ده مينفعش لأن مصر ليها سيادة ولازم ترتب مع الطرف التاني، ومصر ذات سيادة ومتديهاش أوامر يا حج إسماعيل ومتخليناش نرجع لورا عشان منزعلش بعض.

واختتم: مصر ليها 29 يوما منامتش عشان تعرف توقف إطلاق النار وتدخل مساعدات وعلاج وبطاطين عشان تساعد الفلسطينيين وتجيب المصابين تعالجهم، ومصر متحملة القضية الفلسطينية أكتر من إسماعيل هنية وحمدان اللي قاعد في بيروت.