إسعاد يونس تكشف أصعب لحظات مرت بها.. تزوير توقيعات وطرد من المنزل

كشفت الفنانة إسعاد يونس أسرارًا لأول مرة من حياتها الشخصية، وطفولتها وعلاقتها بضرتها الفنانة شريهان.

قالت إسعاد يونس عبر تصريحات تلفزيونية: «والدي توفى وأنا عمري 14 سنة هو مِرض فترة قصيرة وإحنا كنا في الوقت ده مستورين مش أغنياء يعني عندنا سيارتين ودخل وشقة جميلة وبندرس في مدارس أمريكاني».

طفولة إسعاد يونس

وتابعت: «أما دخلنا مع أبويا المستشفى كان معانا فلوس وأما خرج بعد وفاته كل اللي كان معانا 11 قرش فقط، وقتها فيه ستات كتير قرروا يقاطعوا ماما لأنها كانت ست حلوة أوي وصغيرة عندها 32 سنة فبقت خطر على الأزواج تخيّلوا الفترة دي بعد أما بقت أرملة وأمي ليلة وفاة والدي قالت لي إحنا دلوقتي معانا 11 قرش وهنكمّل الحياة زي ما كنا لحد لما نسوّي المعاش».

واستكملت إسعاد يونس حديثها: «وإنتي لازم تبقي عارفة أنا معايا كام بالظبط عشان الطلب يبقى في الحدود وأنا وإنتي هنربّي إخواتك، وابتدت الأمور تمشي كويس بحسن الإدارة وتعليمنا كلنا بإن كل شيء لطيف وجميل سواء أكلنا عيش وملح أو ديك رومي وفي اللحظات الأخيرة قبل وفاة بابا أمي أخدتني معها مستشفى الطيران وقالت لي أبوكي بيموت، قلت لها هنعمل إيه إحنا متقبّلين اللي ربنا هيكتبه له وإحنا قد أي حاجة».

وأضافت: «وابتدت هنا الرحلة وفي الليلة دي حاجتنا اتباعت واتزوّرت توقيعات والدي واتطلب من أمي أنها تسيب الشقة وتمشي عشان ياخدوها وكل ده كنا نتكلم فيه أنا وأمي ونقرر كيف ستكون الحرب المضادة والدفاع عن النفس ونجحنا في كل الأحوال، أبويا كان راجل حلو أوي وعشان كده سميته قمر الزمان لأنه كان جميل وعلّمني أقرأ وكوّنت مكتبة معاه فيها 3000 كتاب».

إسعاد يونس

أسرار إسعاد يونس

وقالت إسعاد يونس عن والدها: «كان مؤمن بي إني بكتب كويس وأخدني للمخرج يوسف مرزوق وخلاه يقرأ الورق بتاعي، وكان بيخليني أراسل الدكتور مصطفى محمود وأنيس منصور وأنا عندي 11 سنة، وسريري هو حبيبي وصديقي الوحيد حاليًا، وأنا رفيقة نفسي تمامًا مع التلفزيون والألعاب اللي على التليفون، وبحاول أبعد إلا إني أرد على أولادي وأحفادي وأخواتي».

وفيما يخص موقفها من زواج زوجها من الفنانة شريهان، علقت قائلة: «تقبّلت فكرة الزوجة الثانية بصدر رحب من باب الحفاظ على استقرار البيت وأول أما عرفت إن جوزي هيتجوز عليا من شريهان اتصدمت وكنت في حالة غيرة ودخلت في نوبة بكاء، وأما هديت فكرت وسألت نفسي كام سؤال أهمهم: هل أنا مثالية؟ هل أنا جميلة الجميلات؟ فكانت إجابتي لأ طبعًا».

واستكملت: «قلت لنفسي أنا بحترم علاء وممكن أتغافل عن زيجته الثانية مقابل الحفاظ على استقرار بيتي، والكنز اللي معايا المتمثل في زوجي، وولادي كمان كانوا سبب في إني أكمّل في الزواج ومفكرش في الانفصال، علاء الخواجة له أفضال كتيرة عليّ، وأما هديت وفكرت بالعقل قلت الظروف خلاص جمعتني أنا وضرّتي وهي كمان كانت شايفاني قدوتها، وقلت هي هتخلف وهيبقى في شراكة دم بيننا وكان الوضع متحضر جدًا بيننا وأنا مكنتش مضطرة أدخل في حروب».

إسعاد يونس

إسعاد يونس وشريهان

وأوضحت أن شريهان تعرضت لحملة هجوم عنيفة بعد ارتباطها بزوجها، وهذا الأمر ضايقها في البداية، ولكنها سرعان ما تجاوزت الموقف.

واختتمت إسعاد يونس: «شريهان لو كنت طلبت منها عينيها كانت هتديهالي وأنا حبيت إنسانيتها وقدرتها على التحمّل وصمودها أمام كل المصايب التي مرت بها، وأنا وأولادي وبناتها كلنا بنعيش في جو عائلي متحضر وفيه سلام وحب».

إسعاد يونس وشريهان