إسلام إبراهيم يتحدث عن فترة مرض والدته ودخولها غيبوبة: «كنت بعيط بحرقة»

وجه الفنان إسلام إبراهيم رسالة إلى والدته في عيد الأم، وتحدث عن رحلة كفاحها مع المرض.

وكتب إسلام إبراهيم، عبر حسابه بـ«فيس بوك» قائلًا: «السنة دي كانت أصعب سنة في حياتي على الإطلاق مش لأي سبب في الدنيا غير لأن أمي تعبت، حرفيًا كنت حاسس إني لا حول ليا ولا قوة وكأني طفل تايه في ملكوت الله .. أربع أيام وعيني مبتنشفش تقريبًا، أطول فترة عيطت فيها في حياتي، أربع أيام مش قادر أحط لقمة في بقي وكأن معدتي معمولها بلوك، لغاية ماربنا استجاب لدعايا وأنا بعيط بحرقة و بتذلل له إنه يشفيها لغاية مافاقت من الغيبوبة بفضل ربنا، وساعتها بس حسيت إن روحي اتردتلي».

وأضاف: «أنا طبعًا وقتها مقولتش لأي حد ولا كتبت على السوشيال ميديا لأني ماكنتش قادر أرد على حد وماكنتش عايز أضيع دقيقة يمكن تحتاجني فيها الدقيقة اللي عرفت قيمتها وهى جنبي، عرفت يعني إيه أفضل أسمع صوتها كل يوم، عرفت يعني إيه أشوف كلمة ماما على التليفون، عرفت إن كل حاجة في الدنيا بتتعوض إلا الأم والأب ممكن تتعوض المال، الشغل، الزوجة حتى الولاد، لكن عمرك ما هتقدر تعوض دقيقة فاتتك من غير ما تكون جنب أمك وأبوك».

وتابع، «عندي إيمان داخلي إن الرابط بين الأم وولادها مش مجرد رابط نفسي أوعاطفي لا في رابط بيولجي، احنا خرجنا من الجسم ده وهنفضل متصلين بيه لأبد الآبدين لأن الحالة الصحية اللي أنا وصلتلها وقت ما تعبت ملهاش تفسير غير كده .. طبعًا لو قلتلكم هى عملتلي إيه هى وأبويا في حياتي أعتقد دي حاجة تحتاج مجلدات، على سبيل المثال لا الحصر في حاجات بكتشفها في شخصيتي بتسهل عليا حاجات كتير في الحياة بعرف إن السبب فيها تربيتك، إني مثلًا عمري ما ببص لحاجة عند غيري أو اتمنظر بحاجة عندي على غيري».

واختتم حديثه، «وسائل الترفيه بجميع أنواعها لو معانا تمنها هنعملها وهننبسط مش معانا فده مش نهاية الكون معني كده اسمه القناعة لو زرعته في ولادك يبقي كأنك سيبتلهم فلوس الدنيا كلها حاجة عمر ما الإنسان بيقدر يكتسبها غير من طفولته وتربيته، ربنا يخليكم ويبارك في عمركم وأفضل خدام تراب رجليكم العمر كله وبالنسبة ليكي يا ماما كل سنة وإنتي طيبة يا أهم حد في الكون».

إسلام إبراهيم بعد تعرضه للتنمر: «مهنة التمثيل بقت قاسية جدا ومش هتقدروا تهزوا ثقتي في نفسي»

«الناس حبت العصابة».. إسلام إبراهيم يكشف حقيقة الجزء التاني من مسلسل «بـ 100 وش».. فيديو