المخرج خالد جلال يوجه رسالة دعم لمحمد كارتر وزوجته شيماء سيف بشأن تأخر الإنجاب

وجه المخرج خالد جلال رسالة مؤازرة إلى المنتج محمد كارتر وزوجته الفنانة شيماء سيف، عقب رسالة كارتر الأخيرة التي تناول فيها موضوع تأخر الإنجاب.

كتب خالد جلال وعبر حسابه على موقع التواصل الاجتماعي فيسبوك: "يا سيدنا كل شيء بميعاد كاتبه ربنا سبحانه وتعالى.. أنا بقى بحبكم أنتم الإتنين جامد، وانتوا الإتنين أعيل من بعض.. يعني أنتوا نفسكم حضانة أطفال مشتركة.. الطيبين الحلوين القمرات ابني وبنتي".

وكان محمد كارتر قد نشر رسالة عبر فيسبوك تحدث فيها عن ضغوطات المجتمع حول مسألة الإنجاب. وقال: "من فترة طويلة وأنا بسمع الناس لما بتقابل شيماء بتقولها انتي لو خسيتي هتخلفي، ودلوقتي لما شيماء خست الناس لما بتقابلها بتقولها أيوة كده خسيتي يعني هتخلفي وهي عمرها ما فكرت ترد وبتقول إن شاء الله".

وأضاف: "وحتى الناس اللي أنا أعرفهم بيقولولي كده ومحدش فيهم ولا لحظة فكر إنها سليمة ومفيهاش أي حاجة ومعندهاش أي مانع إنها تخلف غير إنها مراتي".

وتابع كارتر: "ولو شيماء كانت اتجوزت أي حد غيري كان زمانها مخلفة عادي جدا بس النصيب والقدر خلاها تتجوزني أنا ونكتشف بعد فترة إن عندي مشكلة في الإنجاب، وهي علشان عارفة ربنا كويس قالتلي إن كل شيئ بميعاد واحنا لسه ميعادنا مجاش وهييجي إن شاء الله.. دعواتكم".