تامر حسني عن معاناته في كواليس ألبوم لينا معاد: «تعب مش طبيعي ومستشفيات»

تحدث الفنان تامر حسني عن كواليس العمل على ألبومه الجديد «لينا معاد»، والمعاناة التي مرّ بها حتى يتفوق على نجاح ألبوماته السابقة.

كتب تامر حسني في منشور عبر حسابه الرسمي بموقع فيس بوك: «هنتهز الفرصة الجميلة دي إن أغنية الذوق العالي مع حبيبي اللي بموت فيه الـKing محمد منير تريند عام رقم واحد، وفي تريند الموسيقى لسه أول يوم أهو، والـ13 أغنية بتوع ألبوم لينا معاد في التريند».

كواليس العمل على ألبوم تامر حسني

وتابع: «عايز أقولكم حاجة، عشان كنت أوصل إن ألبومي يدخل التريند كله، وبعيدًا عن التريند يعجبكم كده.. أنا مشيت مشوار كبير، أوله إني كنت بقرأ كل تعليقاتكم السلبية قبل الإيجابية، لأني عارف إنكم بتحبوني، وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته.. وتاني حاجة، احترمت ذكرياتكم اللي على صوتي، وتعبت تعب مش طبيعي، ودخلت مستشفيات نص السنة ومش بحب أقول ولا أنزل أخبار من دي».

واستكمل تامر حسني: «يا جماعة أنا بحبكوا أوي، ومن يوم ظهوري وأنا واحد منكم.. عارف إن فيه ألبومات مكنتش قد توقعاتكم، وإن فيه ألبومات علامات مش هتتنسي.. هي دي الحياة، شوية كده وشوية كده.. بس عارف مدى حبكم لألبوم عيش بشوقك، فكان جوايا تحدي واحد بس إني أتحدى نفسي في عيش بشوقك وأتفوق عليه.. فضلت أذاكر السوق الغنائي وتغير أنماط الموسيقى اللي أنا بحترمها كلها، وبحترم كل الفنانين اللي نجحوا فيها».

تصريحات تامر حسني

وأضاف: «فضلت أطور من أدائي، وأذاكر جوا الاستوديو مع مهندسين صوت لمدة سنتين، وأجتهد مع الموزعين والملحنين والشعراء اللي بشتغل معاهم في تقديم أجدد شيء.. ويمكن زعلوا مني كتير من كتر ما أنا عمال أغيّر وأعدل وأعيد من أول وجديد.. بس دلوقتي فرحتي بالدنيا وهما بيشكروني قدامكم وعلى تليفوني من الإشادات اللي سامعينها منكم في حقهم».

وقال تامر حسني أيضًا: «اشتغلت الألبوم ده وأنا جوايا عناد رهيب إن الألبوم كله يعجبكم.. أكيد هيكون فيه تفاوت في الإعجاب، بس المهم إنكم قدرتوا مجهودي والتنوع اللي قدمته في الأوديو والفيديو.. متشكر من قلبي لكل حد نصحني، وكل حد نقدني عشان بيحبني».

واختتم: «أنا سمعت كلامكم وتعبت أوي، وانتوا أكيد شايفين، تعبت عشانكم، وعشان برضو أحاول أكون واجهة فنية موسيقية جميلة لمصر، بحكم إني بسافر كتير أغني قصاد العالم، واسمي مطرب مصري عربي.. شكرًا شركة TH، انتجتوا ألبوم كامل محترم.. شكرًا صنّاع الألبوم عن ألبوم لينا معاد.. وكل الشكر ليكم يا أغلى الناس.. ربنا يفرحكم زي ما انتوا مفرحني دلوقتي بكلامكم الجميل».