تجاهل دعوته للحفل.. أسباب إعلان محمد رحيم قرار اعتزاله والسفر خارج البلاد

أعلن الملحن محمد رحيم، عن تعليق كل نشاطه الفنّي إلى أجل غير مسمى، ملوحًا باعتزال الفن نهائيًا والسفر خارج البلاد، بعد تجاهل دعوته إلى حضور حفل «ليالي سعودية مصرية»،

وأوضح محمد رحيم، من خلال منشور عبر حسابه على موقع «فيسبوك»، قائلاً: «تعليق كل نشاطاتي الفنية لأجل غير مسمى حتى إشعار آخر، مع احتمالية اعتزال المهنة والسفر خارج البلاد».

محمد رحيم يعرب عن استيائه

كما أعرب الملحن محمد رحيم عن استيائه وحزنه الشديد؛ لعدم دعوته إلى حضور حفل «ليالي سعودية مصرية»، والذي أقيم في دار الأوبرا المصرية، بحضور عدد كبير من نجوم الفن، وخاصة الملحنين وصناع الأغنية في مصر والوطن العربي.

وكتب الملحن محمد رحيم عبر حسابه الشخصي على موقع «فيسبوك»، قائلاً: «سؤال يا جماعة.. هو ينفع حفلة زي دي تعزموا كل ملحنين وصناع الموسيقى في مصر إلا محمد رحيم طيب إزاي؟؟ ده أشهر وأهم أغاني النجوم دي كلها من أعمالي، يعني شيرين اللى طلعت غنت مشاعر والوتر الحساس وصبري قليل.. كل دي حاجات محمد رحيم، مع احترامي لكل المبدعين اللى موجودين طبعا كلهم فوق راسي وإخواتي».

حصوله على جائزة مع عمرو دياب

وأضاف محمد رحيم قائلاً: «وعمرو دياب اللى قاعد ده أنا واخد معاه جائزه الـميوزيك اوورد العالميه، وطلع غنى غنوتي وهو بيستلم جائزته سنه 2001 (حبيي ولا على باله)، ومعالي وزيرة الثقافة اللي شرفت الحفلة حرفيا وهي سيدة فوق الوصف في الأخلاق وبكن ليها كل حب واحترام هي اللى سهلتلي إجراءات السفر لفرنسا من كام شهر علشان أروح أستلم جائزة العضوية الكاملة الماسية اللى هى آخر حاجه ممكن يحصل عليها ملحن أو مؤلف على مستوى العالم.. وبالمناسبة وأنا هناك جبت معايا كل شهادات التقدير والاحتراف بتاعت زملائي الأصغر مني سنا كلهم اللى كانوا أول مره بيتكرموا وساعتها قلت إن مصر أكبر دولة حصلت على تكريمات السنادي من مؤسسة SACEM.FR باريس في مجال الموسيقى».

وأستكمل الملحن الشهير حديثه قائلاً: «حتى الفنان محمد منير اللى حضوره نور الحفلة، أنا اللى عامله يونس وياحمام وقلبي ميشبهنيش، اللى هما بالمناسبة كلمات الشاعر العظيم عبد الرحمن الأبنودي اللي مكانش بيشتغل غير معايا من جيل الملحنين الشباب إيمانا بموهبتي وحققنا نجاحات كبيرة جدا الحمد لله سوا، وبالمناسبة هو اللي كاتب عيون القلب اللي لحنها الموسيقار الموجي، يعني منير لو كان غنى يونس إمبارح كان هيبقى الخال الأبنودي اتغناله عملين في نفس الحفلة: عيون القلب لحن الموسيقار محمد الموجي، ويونس لحن محمد رحيم».

وأضاف محمد رحيم قائلاً: «طيب ولو اتكلمنا عن الليالي المصرية السعودية والتعاون ما بين أكبر بلدين عربيتين في مجال الفن، طب وهو فيه تعاون أحلى من التعاون اللي حصل بيني وبين الشاعر السعودي الكبير سعود الشربتلي اللي كتب غنوة الوتر الحساس لشيرين وأنا لحنتها وتعبت فيها وبذلت فيها مجهود كبير لحد ما نزلت والحمد لله حرفيا هي النهاردة أغنية عربية عالمية (قولا واحدا) لأن كل جنسيات العالم بيغنوها بالعربي ومواقع التواصل موجوده وتشهد».

واختتم محمد رحيم، حديثه قائلاً: «معرفش بس حبيت اسأل يعني هو لحد امتى المبدع المجتهد هنفضل نحط من قدره ونقتله معنويا بالشكل ده؟ وهل ده مقصود ولا حدث سهوا، وعلى فكرة أنا بتكلم عموما في المبدأ مش بس الجزء اللي يخصني، معرفش ليه الموقف ده فكرني بغنوه بتاعتي غنتها نانسي عجرم اسمها (في حاجات تتحس ومتتقالش) بس لما تلاقيها مش بتتحس بتضطر تقولها!.. هو الرجل الأكثر نفوذا هيقعدنا في بيتنا جوه بلدنا كمان ولا ايه».

يذكر أن الملحن محمد رحيم تعاون مع عدد كبير من نجوم الغناء في مصر والوطن العربي، ومن بينهم عمرو دياب، محمد منير، شيرين عبد الوهاب، نوال الزغبي، إليسا، هيفاء وهبي، نانسي عجرم، وآخرون.