حسن الرداد: تلقيت عروض لإحياء حفلات وابني غيّر فيا

تحدث الفنان حسن الرداد عن أسرته وكواليس أعماله الفنية، وأسرار لأول مرة يكشفها.

قال حسن الرداد عبر تصريحات تلفزيونية: «أهم شيء في حياتي هم عائلتي ولكن من الصعب التوافق بين عائلتي والتصوير وخصوصًا فى شهر رمضان، التصوير بيستغرق حوالي 15 ساعة فمش بلحق ولا بعرف أشوف ابني ولا أقعد مع أهلي».

تصريحات حسن الرداد

وتابع: «فادي غيّر فيا حاجات مهمة ويمكن حصلت لي تغيرات نفسية وبدأت أركز أكتر في نفسي علشانه، ونور حياتي وظهرلي نور جديد في وسط الضلمة وخاصةً بعد وفاة والدتي، وبعوضهم عن أوقات شغلي في الأوقات اللي بكون معنديش تصوير فيها، أنا من الناس اللي بحب أقعد في البيت قوي، وبحب أقعد مع ابني كتير وأسافر معاه».

وحسم حسن الرداد أنباء حمل زوجته إيمي سمير غانم للمرة الثانية، قائلًا: «ربنا يجيب المولود اللي جاي بسلامة معُافى وسالم ومش فارق معايا ولد ولا بنت كل اللي ربنا يجيبه هبقى مبسوط بيه وأهم حاجة إيمي تقوم بالسلامة».

كواليس أعمال حسن الرداد

وأشار إلى أنه تلقى عروض لإحياء حفلات وأفراح بعد النجاح الكبير لأغنيتي «يا واحشني إديني رنة، وهوب»، معلقًا: «جالي كمية ناس عايزيني أروح أحيي حفلات وأفراح وكنت بروح أجامل، وكنت مستغرب في الأول، أول ما أدخل يدوّني المايك والـDJ يشغل الأغنية».

وأوضح حسن الرداد أن هذه الظاهرة أصبحت منتشرة عالميًا، حيث يقوم العديد من الممثلين في الخارج بإحياء حفلات حتى وإن لم يكونوا مطربين محترفين مثل هيو جاكمان وجوني ديب.

وقال إن عرض فيلم احكي يا شهرزاد كان عام 2009، ومنذ هذا الوقت توقف عن تقديم المشاهد الجريئة، ووافق عليه لأنه كان يرى فيه فرصة سينمائية مهمة، حيث كان يتم تقديمه كبطل في السينما لأول مرة، مضيفًا: «لو رجع بيّ الزمن وقتها، كنت هعمل الفيلم تاني، لأنه كان عاجبني فعلًا.. الفيلم كان جميل جدًا وشارك من خلال في العديد من المهرجانات الفنية والسينمائية».

واستكمل: «دلوقتي ممكن أكون مش حابب أعمل النوع ده من الأفلام، لكن مش علشان بقينا في 2025 أو علشان بقت أب».

واختتم حسن الرداد قائلًا: «محمد صلاح العشق وليفربول حياتي وحسام حسن الأسطورة وأتمنى يدرب الأهلي».