حسن الرداد عن دنيا سمير غانم بعد ظهورها باحتفالية قادرون باختلاف: «جمهورك كله مبسوط بعودتك»

عبر الفنان حسن الرداد عن سعادته البالغة بعد ظهور الفنانة دنيا سمير غانم أمس، في احتفالية قادرون باختلاف لأصحاب الهمم وذوي القدرات الخاصة، بحضور الرئيس عبد الفتاح السيسي .

وكتب حسن عبر حسابه الشخصي «فيس بوك»، «أختى الغالية، سعيد جدا بظهورك و بحضورك الراقى فى هذا الحدث الكبير و بدورك الايجابى فى خدمة المجتمع».

وأضاف، «جمهورك كله مبسوط بعودتك و إن شاء الله تقدمى لهم اعمال ناجحة كالعادة».

تحدثت الفنانة دنيا سمير غانم، عن مشاركتها اليوم، وكتبت دنيا عبر حسابها الشخصي بموقع تبادل الصور والفيديوهات «انستجرام»: «شرفت النهاردة بالغناء أمام سيادة الرئيس عبد الفتاح السيسي في احتفالية قادرون باختلاف، وسعدت وتشرفت بكلامه ليا جدا وبنظرته اللي كلها أبوة».

وأضافت، «أحب أشكر الجمهور العظيم اللي دايما بيشجعني، وشفت في عنيهم وفي ردود أفعالهم فرحتهم بوجودي في الحدث الهادف مع الملايكة، اللي كانوا سبب في ثقتي بنفسي النهاردة بإحساسهم الصادق في تعبيرهم عن حبهم ليا، الحمد لله وفرحتهم باليوم ده وإن في حد مهتم بيهم وبيفكر فيهم وفى احتياجاتهم».

وتابعت،: «وبشكر كل الزملاء والأساتذة اللي اتشرفت إني كنت موجودة معاهم في نفس الحفلة، وعلي رأسهم الموسيقار الكبير عمر خيرت وأستاذ أشرف عبد الباقي، سعيدة جدا إني ابتديت يومي بتشجيعهم وحرصهم إنهم يطمنوا عليا قبل ما أطلع، وكمان زملائي الأعزاء مصطفي شعبان، ويوسف الشريف، والمذيعين شريف مدكور، وإيمان الحصري، اللي مروا بظروف صعبة وعدوها بكل قوة وثبات بفضل ربنا ورحمته، وكنت مبسوطة بيهم، وحسيت أد إيه أغلب الموجودين مننا كان عندهم تحديات في حياتهم زي الملايكة اللي استمدينا قوتنا منهم النهاردة، ومن أهلهم الأبطال، وبشكر كل القائمين علي الاحتفال دكتور أمل مبدي الأم التانية لـ القادرون باختلاف.

وأكملت حديثها، «فخورة جدا بأخويا هشام جمال لأنه اشتغل وتعب من قلبه في إخراج الحفلة، والأغاني واختيار الأصوات اللي دخلت قلوبنا كلنا، وعن نفسي بشكره علي أغنيتي بلادي اسلمي، كلمات الشاعر الموهوب محمد إبراهيم وألحان العبقري المتنوع هشام جمال وتوزيع الموزع الشاطر جدا مادي.

وأنهت كلامها، « في النهاية حبايبي الغاليين بابي ومامي، اتأثرت جدا النهاردة إني لأول مرة أروح في يوم مهم ليا من غير ما أسمعك يا مامي بتدعيلي أو ترقيني قبل ما أنزل، أو بابي بيقول لي ربنا معاكي يا حبيبة بابي، يا رب أكون شرفتكم، بحبكم ووحشتوني أوي.. ربنا يرحمكم يا أغلي حاجة في حياتي».

حسن الرداد يدعم رشوان توفيق: «أرجو ألا تحزن و كلنا أولادك»

حسن الرداد يوجه رسالة لـ إيمى: ربنا يصبرك وترجع ضحتك الحلوة يا أحلى زوجة