حسن فؤاد: «حاربت عشان أغني أرابيسك وفتحت الباب لهشام عباس وفؤاد»

كشف الفنان حسن فؤاد، حكاية رفض الكاتب والمؤلف الكبير أسامة أنور عكاشة غناءه تتر أرابيسك ودعم الموسيقار الراحل عمار الشريعي له ورهانه عليه بالمسلسل.

حسن فؤاد ومسلسل أرابيسك

وقال حسن فؤاد، في تصريحات ببرنامج «إنبوكس»، المذاع على قناة صدى البلد 2: «عشان حسن فؤاد يغني أرابيسك كانت حرب، فمن كان يجرؤ أن يغني بجانب علي الحجار ومحمد الحلو تتر في ذلك الوقت؟.. محمد منير ومدحت صالح كان ليهم حاجات حلوة وقتها، ولكن لم يكونا مركزين في تترات المسلسلات».

حسن فؤاد وعمار الشريعي

وتابع حسن فؤاد: «عمار الشريعي راهن عليا في غناء أرابيسك، وكان مؤلف المسلسل أسامة أنور عكاشة رافض غنائي له، وكانت أنغام عاملة (العائلة) مع وحيد حامد، وعلي الحجار كان ليه تتر مسلسل أيضا، وأستاذ عمار الشريعي قال للأستاذ أسامة هنحط ولد قدام الميكرفون ونديله فرصته يغني، لو عجبنا يبقى خلاص المسلسل بتاعه، لو معجبناش يبقى نجيب علي الحجار أو محمد الحلو يغنوه».

واستكمل فؤاد: «لقيت الأستاذ عمار بيكلمني وقالي (يا ابني أنا رميتك في البحر وأنت عوم)، ولما غنيت انبهروا بيا وخاصة الأستاذ ومخرج المسلسل الكبير جمال عبد الحميد، وبعد كدة فتحت الباب قدام كل المطربين إنهم يغنوا هشام عباس ومحمد فؤاد وخالد عجاج».

حسن فؤاد وعلي الحجار ومحمد الحلو

وأضاف: «إني أتحط في حتة جنب علي الحجار ومحمد الحلو حاجة كبيرة، واستمريت 3 سنين على التوالي (آرابيسك وعلي يا علي والوتد)، وأنا نجحت نجاح إذاعي لأن الناس سمعت صوتي مشفتنيش وقتها، وده أصعب من النجاح التليفزيوني».