حسين فهمي في ندوة تكريمه بمهرجان الشارقة السينمائي: أنا رقيب على أعمالي

تحدث الفنان حسين فهمي عن مشواره الفني، وحرص على تقديم مجموعة من النصائح للشباب في الفن، قائلًا: «الفنان لازم يكون مثقف، إحنا بنتسأل في كل حاجة، يعني مثلا إحنا بنتسأل إيه رأيك في اللي بيحصل في غزة».

وتابع الفنان حسين فهمي في الجلسة النقاشية «مشوار فنان» ضمن فعاليات مهرجان الشارقة السينمائي الدولي: «لازم أبقى فاهم سياسة علشان أرد، علشان مينفعش أقول أي حاجة، وأنا صغير كنت لما اسأل في حاجة أهلي يقولولي افتح إنسيكلوبيديا، قاموس كبير في كل أو أغلب المعلومات».

حسين فهمي مهرجان الشارقة السينمائي

واستكمل الفنان: «دلوقتي الموضوع أسهل، الانترنت سهل كل حاجة، علشان كده سهل تبقي مثقف ودارس.. إحنا جيلنا مكنش بيهمه المادة، أنا كان عندي عربية اسمها رمسيس ولما جبت الـ 28، حسيت إني جبت مرسيدس، وأكيد المعاناة هي اللي بتصنع الفنان وبتدمره، وكنا كلنا بندور علي الشغل وبس».

وقال حسين فهمي في الجلسة النقاشية اليوم الثلاثاء 24 أكتوبر 2023: «لكن الجيل الجديد بيعدي ويبصلنا، مش زينا كنا أما نشوف حد من جيل أكبر كنا نقوم نقف، في ناس كتيرة مش بتبقي عارفة إيه سبب نجاحها وسقوطها، علشان كده لازم الفنان يكون علي أرض ثابتة».

تصريحات حسين فهمي

وأضاف: «لكن الأصعب هو البقاء على القمة، لأني من أول فيلم وأنا نجم، مكنش عندي سلم، وعلشان كده كان من أصعب ما يمكن إني أحافظ على القمة.. أنا رقيب على أعمالي، خاصة أن هناك نقابة والنقابة هي المسؤولة عن العقاب، وفي هذه الأيام إحنا لازم منقبلش عادات وتقاليد غربية محددة».

وتحدث الفنان حسين فهمي عن الاحتلال الإسرائيلي وقصفه لغزة بجانب تأثير ذلك على مصر، قائلًا: «مصر تعاملت مع إسرائيل قبل كده، وهتقدر تتعامل من تاني، ومع إلغاء الدورة القادمة من مهرجان القاهرة السينمائي الدولي، إلا أن في حاجتين كان لازم يخلوني متواجد هنا، الأول هو توقيع البرتوكول مع مهرجان الشارقة السينمائي الدولي، والثاني بسبب تكريمي.. أنا حبي للسينما بدأ بدري أوي».

حسين فهمي في مهرجان الشارقة

ندوة حسين فهمي في مهرجان الشارقة

وتابع: «من أول أفلام الأبيض والأسود القديمة، التي استهوتني جدًا وحبيتها، وخلتني أشوف السينما الأمريكية، خصوصًا أن السينما الأمريكية دخل فيها الألوان بدري عننا، والخيال اللي في السينما خلاني أدور ورا القصص، واكتشفت أن السبب في كل هذا الخيال هو المخرج، ومن هنا قررت أني أكون مخرج».

وقال الفنان حسين فهمي أيضًا: «وبدأت أجيب كتب واقرأ وأفهم، وشكلت شخصيتي ومستقبلي من هنا.. أنا جاي من أسرة أرستقراطية، وبالتالي فكرة السينما دي كانت بعيدة أوي، وقرروا أني لازم أدرس قانون إلا أني اكتشفت أن معهد السينما فتح، وأخدت أوراقي ودرست فعلًا، ومن بعدها سافرت درست في جامعة كاليفورنيا في لوس انجلوس».

حسين فهمي ونجوم الزمن الجميل

وتحدث عن عمله في هوليوود، قائلًا: «وطبعا بدأت شغل في هوليوود هناك بعد بداية الحرب، لمدة 3 سنوات، إلى أن كلمني أستاذي يوسف شاهين، واللي كان وقتها بيعمل فيلم الاختيار، وكان محتاجني وقتها كمساعد معاه، بس هما طلبوني كممثل في فيلم آخر، ونجح جدًا من أول عرض، ومن هنا بدأت طريق التمثيل».

وعن علاقته بنجوم الزمن الجميل، قال: «بحب يوسف وهبي وكان صديق والدي وكان دائمًا ييجي عندنا البيت وكنت بحب أقعد أقلده وأقلد طبقة صوته، والمخرج يوسف شاهين اشاد بي أكثر من مرة بس وأنا مخرج، وطلب مني فؤاد المهندس أقدم شخصية في فيلمه فيفا ظلاطا وعملت الشخصية زى ما هو عاوز بالظبط وبردوا طلب مني في فيلم مافيا دور عملته.. بحب جدًا أعمل الشخصيات دى بمزاج لأني بحب السينما».

حسين فهمي في مهرجان الشارقة