حكاية «الصقر» الصديق المخلص للشهيد أحمد المنسي

روى كريم باشا، صديق مقرب من الشهيد أحمد المنسي، موقفا إنسانيا للبطل الراحل خلال إحدى عمليات القوات المسلحة في العريش.

وقال باشا عبر صفحته على موقع التواصل الاجتماعي «فيس بوك» «أولا قبل ما أحكي علي قصة الصقر ده عايز أقول إن الكتيبة ١٠٣ صاعقة مليانة أبطال و شهداء ضباط و صف و جنود كل واحد فيهم حكاية لوحده عايز أيام نحكي عنه و علي رأسهم قائد الكتيبة العقيد رامي حسانين و بعديه العقيد أحمد منسي و الحمدلله ربنا أكرمني و عشت شوية صغيرين مع أبطال كتير جدا الواحد ميجيش ضافر فيهم و أتمني ربنا يحسن ختامنا و الناس تجيب سيرتي بكل خير . أحكيلكم بقي عن الحكاية و المعني الكبير اللي أنا مستوعبتوش و مفهمتوش غير بعد كده و أن ناس كتير بتقول إشمعنا المنسي».

وتابع «كان في يوم طالعين مداهمة بالنهار و كان الشهيد المنسي قائد المأمورية و معانا العساكر و الناس و كنا في مكان صحراء في العريش و إحنا ماشيين علي رجلينا لقينا صقرين تحت صخرة كبيرة شكلهم طبعا صغيرين لسه مبيطيروش فلقيت الشهيد المنسي بيقولي تعالي نجبهم معانا الكتيبة شوفلي حبل مع العساكر أو السواقين قولتله هنعمل إيه بيهم ملهمش لازمة قال لي إسمع الكلام و فعلا جبنا حبل و ربط كل واحد في عربية و إحنا ماشيين بقوله هتعمل بيهم إيه رد عليا رد مستوعبتوش سعتها».

وأضاف «.قال لي أولا هيموتوا هنا في الحر شكلهم واقعين من عش أو من الصقور الكبيرة ناخدهم معانا الكتيبة نشربهم و نأكلهم أي حاجة و بعدين يا كريم دول هيحكوا إحنا عملنا إيه معاهم و بنعمل إيه في أرضهم زي ما الزرع اللي علي الأرض ده هيحكي كل حاجة عنا دول الاتنين مش هيكدبوا أبدا،إستغربت جدا و أنا في سري بقول إحنا في إيه ولا في إيه عايزين نخلص و نرجع علي خير صقر إيه دلوقتي و هيحكي إيه يا منسي المهم رجعنا فعلا علي الكتيبة و فعلا العساكر خدت صقر قال لهم أوعوا يموت و هو فضل محتفظ بواحد و بقي زي صاحبه كانت كيميا بينهم غريبة بقيت كل ما أشوفه أقوله أخبار إبنك إيه يفضل يضحك يقولي كويس ... و مشيت من الكتيبة و معرفش إيه اللي حصل للصقر من بعده».

واختتم «فعلا كان الله يرحمه مختلف و عنده فكر و عقيدة قوية بشكل و تفكير غريب زي ما بنقول بره الصندوق كل الناس بتفكر في إتجاه و هو في إتجاه و بمنظور تاني خالص سبحان الله ربنا فعلا بيحبه ..ربنا يرحمه ويسكنه فسيح جناته و يبارك في ذريته».