حكاية عبدالله غيث مع نجم هوليوود في «الرسالة».. طلب تقليده وكان يخشى موهبة «الشديد»

تحل اليوم ذكرى ميلاد الفنان عبدالله غيث الذي لقُب بـ «الشديد»، فهو من مواليد يوم 28 يناير عام 1930 في محافظة الشرقية، ثم انتقل إلى القاهرة ليدرس المسرح في المعهد العالي للفنون المسرحية، وتخرج عام 1955.

بدأ عبد الله غيث مشواره الفني في أواخر الخمسينيات، وشارك في العديد من الأعمال بأدوار صغيرة بالبداية، وكانت نقطة انطلاقه الحقيقية من خلال المسرح، وشارك في عشرات المسرحيات وتنوعت أعماله بين السينما والمسرح والدراما حتى وصل إلى العالمية.

محطات في حياة عبدالله غيث

وصل النجم الراحل عبدالله غيث إلى العالمية بعد مشاركته في فيلم الرسالة مع المخرج مصطفى العقاد، ونجم هوليوود أنطونى كوين.

قال عبدالله غيث عن تقديم شخصية حمزة بن عبد المطلب في فيلم الرسالة، إنه حصد على إشادة من الممثل العالمي أنطوني كوين الذي جسد نفس الشخصية بالنسخة الأجنبية، ونشأت بينهما صداقة قوية استمرت سنوات طويلة، معلقًا: «لقيتهم بيصورا المشهد الأول في الفيلم بالإنجليزى وبعدين يدخل العرب يمثلوا نفس المشهد في نسخة الفيلم العربي، وأنا قولت هشوف أنطوني كوين بيمثل إزاى، وأدخل أمثل نفس المشهد هعرف أقلده وإذا قدرت أضيف حاجة من عندي في المشهد هضيف، أنا برضه بعرف أمثل».

عبدالله غيث

عبدالله غيث فيلم الرسالة

وتابع: «فوجئت يوم التصوير بهاتف من مدير أعمال مستر أنطوني كوين، يقولي مستر كوين عايزك، المهم رديت عليه فقالي أنا عندي ليك رجاء قولتله أنت تؤمر، قالي أنا ليا عندك رجاء أنا عاوزك تمثل أنت قبل مني، لأن عايز أتعلم منك، فاتصدمت من عظمة هذا الرجل وللأسف فهو حرق لي الخطة اللي كنت عايز أعملها أن أتعلم منه وهو بيمثل».

واستكمل: «المهم قالي عشان عايز أتعلم منك كيف يكون الإنسان العربي؟، إزاى بيتكلم مشيته إزاى، لأن شوفت الممثلين الإنجليز وهم بيمثلوا ما أقتنعتش بيهم، بيمثلوا كدة زى ما يكونوا بيمثلوا في مسرحية شكسبيرية، خواجات لابسين عرب أنا عايز أبقى عربي مية في المية، فأرجوك عايزك تمثل أنت قبلي، وبما أننا في بلدك، ما هو معتبر المغرب بلدي لازم تنفذ طلبي، المهم اتلخبطت، عشان أنا كنت عايز أقلده».

وقال الفنان الراحل عبدالله غيث في لقاء تلفزيوني نادر له: «قعدت قرأت الفاتحة 100 مرة، وساعة لما نادوني للتصوير، نزلت سكينة عليا ما أعرفش نزلت إزاى، بقول فيض من عند ربنا وقولت لنفسي ياد عبد الله، إيه الحكاية، أنت خايف من أنطونى كوين ليه هو بعبع.. دا أنت ابن حضارة تنتمى لآلاف السنين، قد حضارة أنطوني كوين 10 مرات، إيه هتخاف من إيه؟، وحمزة ده بتاعك، وتاريخ محمد رسول الله عليه أفضل الصلاة والسلام ده بتاعك أنت».

وأضاف: «ونزل على قلبى بردًا وسلامًا وجيت طالع على المشهد بتاعي، اللي كنا بنصوره على الكعبة بتاع الحشرة اللى بتاكل وثيقة قريش اللي كانت ضد الرسول، عليه أفضل الصلاة والسلام، وكان أول مشهد في التصوير، وطلعت بصيت لقيت نفسي أقدامي ثابتة زى الحديد، وروحت قايل المشهد من أول مرة، وإذا بالجماهير العريضة الموجودة من مغاربة وسوريين ومصريين بالآلاف بيهتفوا الله أكبر.. الله ينصرك ياعربي.. وبعدها فوجئت بأنطوني أتخطف».

واختتم عبدالله غيث: «كانوا بيشفوني الفنيين والفنانين الإنجليز كعبد الله غيث ماشي عادى كدة ساعات أكون ماشي بالشبشب يقولوا هو ده اللي هينافس أنطوني كوين، وبقيت بحس في نظراتهم بالإشفاق.. تاني يوم بقيت أعدى عليهم أى إنجليزى من دول بقى يرفعلي البرنيطة هاللو سير، وطلع أنطوني كوين بعد مني يصور المشهد غلط فيه 3 مرات».

عبدالله غيث

لقب عبدالله غيث

كشف الفنان الراحل أيضًا سر لقب الشديد الذي اشتهر به، وأوضح أنه بسبب مسلسل تليفزيوني، كان يؤدي مشهدًا وأجاده بشكل كبير، لذا قال عنه الفنان الراحل صلاح قابيل: «ياه دا شديد أوي».

عبدالله غيث

عبدالله غيث