خالد جواد يحذر من الزعل: حصلي التهاب حاد فى عصب المخ.. عيني مبتقفلش

حذر خالد جواد، المذيع بإحدى محطات الراديو، من خطورة الزعل وتأثيرها على صحة الإنسان، والآثار الجانبية التي لها العديد من الأضرار على حياة الأشخاص.

خطورة الزعل

ونشر خالد جواد عبر حسابه الرسمي على موقع التواصل الاجتماعي «فيس بوك»، قائلًا: «من فضل ربنا إنى صحيت تانى يوم الصبح الحمد لله، بس صحيت نص وشى واقف تماماً ( الجانب الأيسر) بما فيهم العين، وده اتسبب فى أن عينى مبتقفلش الجفن ولا بتفتحه وده بسبب تعطيل كلى فى العصب الحسى و التهاب حاد فى عصب المخ المسؤال عن تحريك أعصاب الوجه ».

وتابع: «عشان كده دكاترة المخ و الأعصاب و دكاترة الرمد نصحونى انى اغطى عينى عشان القرانية بتضعف و ده هيدخلنا فى مشاكل تانية ، أنا الحمد لله كويس جداً .. و ده ابتلاء من الله سبحانه وتعالى عشان يفوقنى و يقولى ركز فى امتحانك شوية .. ابتلاء و بياخد وقته مع العلاج و التمارين و الحمد لله انا راضى جداً من اللى حصل كدرس اتعلم منه عدم الزعل !».

أضرار الزعل

وأكمل خالد جواد،«بفكركم و بفكر نفسى .. ان كل واحد ليه امتحانه فى الدنيا .. ركز فى امتحانك و افرح لنجاحاتك و خطط للحظات وقوعك و اتعلم منها و عدى بيها ، ملكش دعوة بإمتحان غيرك .. متزعلش من حد ولا على حد ولا حتى تزعل من أو على نفسك .. اتبسط و احمد ربنا و اشتغل و اعمل خير و بر والديك ما استطعت و اسعى فى الدنيا بالخير».

وأفاد: «تانى ملكش دعوة بإمتحان غيرك .. متخافش على حد .. متشلش هم حد .. اسعى فى الخير ما استطعت .. اكنك بالظبط عربيتك واقفة فى الصحراء و واحد صاحب كلمك قالك الحقنى انا عربيتى عطلانة تعلالى .. فا تسيب شغلك و همك و مشاكلك عشان تروح تمتحن امتحان غيرك ،ركز فى امتحانك و سيب الناس تركز فى امتحانها الدنيوى .. مش بقولك تبقى انانى و منحط لا بالعكس اسعى بالخير .. بس متبقاش انت بايظ و تروح تصلح غيرك و تنصحة و تسأل عمل ايه و تنسى نفسك اللى ليها حق عليك».

أهم قواعد الرضا

وأكد خالد جواد، أن من أهم قواعد الرضا و عدم الإكتئاب هو انك تسامح و تسامح من قلبك لأن الزعل : يعطى الشعور بالقلق أو التململ أو العصبية.. البطء في التفكير أو التحدث أو تعطل حركات الجسم .. الشعور بانعدام القيمة الذاتية أو الذنب أو تركيز التفكير على الإخفاقات السابقة أو إلقاء اللوم على النفس لأشياء خارجة عن إرادتك .. وجود صعوبة في التفكير والتركيز واتخاذ القرارات وتذكر الأشياء، قائلا «أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنْتُمْ تَتْلُونَ الْكِتَابَ أَفَلا تَعْقِلُونَ».