دينا الشربيني تنعى هيثم أحمد زكي.. «مش مصدقة إني مش هشوفك.. نفسي نخاف على بعض مش لازم نستنى حد فينا يموت»

نعت الفنانة دينا الشربيني، الفنان الراحل هيثم أحمد زكي، الذي توفي أمس الخميس، عن عمر يناهز 35 عاماً.

وقالت الشربيني عبر صفحتها على «فيس بوك» «أنا مبعرفش أكتب ولا عمري كتبت، بس أنا مش قادرة أصدق أنى مش هشوفك تانى، ولا هتكلمني في التليفون تاني وتقولي يالا نتقابل، ولو مردتش عليك ألاقيك بعتلى مسدچ بتقللى طظ فيكى مش هكلمك تانى ، وأول ما ابعتلك أقللك يابنى ملحقتش أرد ده التليفون رن مرتين تقللى خلاص امسحى المسدچ وكأنى مبعتلكيش حاجة».

وتابعت «طول اليوم كنت بهرب من أنى أصدق إن ده حصلك أنت ياهيثم، لحد ما جيت أنام دلوقتي ومش هاين عليا أنام وإحنا سيبينك لوحدك، كنت دايما تقولنا كلنا اسألوا عليا لحسن أموت لوحدي و محدش يعرف، كنت طيب وجدع وحنين وعامل زى العيال الصغيرة».

وأكملت « نفسى نحب بعض كلنا ونخاف على مشاعر بعض، مش لازم نستنى حد فينا يموت علشان نفهم ان الدنيا مش مستاهلة، أنا عارفة إنك فى مكان أحسن من اللي إحنا فيه وسط حبيبك، كان نفسك ترحلهم واديك رحت يا هيثم».