رحمة حسن توضح تفاصيل خلافها مع المنتج هاني أسامة : «كنت بطلب حقي وبيتهرب»

تحدث الفنانة رحمة حسن عن أزمتها مع المنتج هاني أسامة، وعدم تسديد مبلغ مالي قدره 40 ألف جنيه لها .

وكتبت رحمة عبر حسابها الشخصي بموقع تبادل الصور والفيديوهات «انستجرام»، « كل الاحترام والتقدير للدكتور اشرف ذكي .. علي استجابته وسؤاله.. واحب اوضح ان الفلوس الي ليا عند هاني اسامه المنتج هي باقي اجري عن مسلسل سابع جار .. وكان ليا جزء كبير منها .. ولجأت للدكتور اشرف في ٢٠١٩ علشان يساعدني .. وحصل .. واداني جزء بسيط من فلوسي».

وأضافت، «للعلم الوقت ده كان بابا تعبان وفي المستشفي وهاني أسامة كان عارف وقلتله اني محتاجه الفلوس ارجوك .. ورفض بعدها يديني اي فلوس من باقي اجري ومكانش بيرد علي رسايل او مكالمات مني .. للاسف بابا اتوفي بعدها بكام يوم ..ومن ساعتها وانا تعبانه ومش ناسية هو عمل معايا ايه».

وتابعت، «كان صعب عليه اني اطلب تاني من دكتور اشرف انه يتدخل لان هاني مش بيستجيب اصلا .. وانا كنت تعبت من كتر مابطلب حقي وهاني بيتهرب .. بس بين كل فتره والتانيه كنت ببعتله رساله او اكلمه وبرضوا مافيش حاجه .. كل ده بمنتهي الذوق والاحترام والرسايل موجوده معايا من ٢٠١٨ كله علي التليفون .. وطبعا الوقت بيعدي وانا معنديش شغل ماعنديش دخل .. تعبت وبعتله تاني من كام يوم وقلتله .. وبرضوا مافيش حاجه .. وكمان العقد بتاعي معايا ومخصوم منه الضرايب الي دائما بدفعها علي اي عمل بشارك فيه من زمان .. العقد بتاعي علي مسلسل ٦٠ حلقة .. هاني صور وذاع ٦٧ حلقه يعني ليا كمان ٧ حلقات مش موجودين في عقدي وماختش عليهم كمان اجر و ماطلبتش بيهم اصلا بس هو عارف».

واستطردت، «الفكرة أنه طلع أن في كذا شخص في الشغل مش انا بس ، عندهم نفس الموقف مع هاني .. ويمكن بفلوس اكتر بكتير وفي نفس الموضوع والنقابات والقضيه وما الي ذلك، أما بخصوص أن الدكتور اشرف طلب مني اني اروحله النقابه عشان نتكلم في الموضوع .. انا قلتله اني مش عايزه اتعبه اكتر من كدا معايا».

وتابعت، «خصوصا اني عارفه اني مش نقابيه واني بشتغل بتصاريح ومش عايزه اضيع وقته خصوصا انه ساعدني قبل كدا.. وكمان عشان عارفه ان هاني مش بيستجيب عشان هو منتج فا تبع نقابه تانيه .. وكنت عارفه ان الدكتور اشرف كلمه قبل كدا في موضوع الفلوس ده و برضوا ماحصلش حاجه .. يعني لو كان عايز يدفع كان دفع من زمان .. المسلسل اتذاع وخلص وهاني عمل بعده كذا عمل .. انا قلت للدكتور اشرف اني مش هاقدر اجي لاني تعبانه واني مش هاشيل البوست لحد ماخد فلوسي .. لاني بحاول اجيب حقي الي بقالي ٣ سنين مش عارفه اجيبه» .

وجهت الشكر لكل من دعمها، « شكراً لكل حد اهتم .. بس انا حبيت اوضح ايه الي بيحصل .. وشكرا لكل الي ساعد والي بيحاول يساعد .. وللعلم انا لسه ماخدتش فلوسي برضوا .. شكرًا واخيرا .. لم ادلي باي تصريح صحفي ولست مسؤلة عن أي كلام يكتب عن بالنيابه عني».

وقد تصدرت رحمة حسن تريند مواقع التواصل الاجتماعي “جوجل”، بعد طلبها حقها خلال الساعات الأخيرة .

وكتب إحدى الممثلات الشابات تدعي كوثر يونس، ” أنا كمان ليا فلوس، واستعوضت ربنا فيهم، كل واحد ياخد علي قد نيته، ليا فلوس من 2018 وقال لي تعالي خديها اخر يوم ولما روحت قالولي خديها من الشركة، وطبعا كلنا عارفين لما تروحي الشركة دي عاملة ازاي”.

بينما قال الفنان الشاب أدم عبد الغفار، ” كل الدعم لرحمة حسن، أنا كمان ليا فلوس عند هاني أسامة، أنتي مش لوحدك”.

حيث كتبت رحمة حسن عبر حسابها الشخصي على موقع التواصل الاجتماعي لتبادل الصور والفيديوهات «إنستجرام» قائلة، «صباح الخير احب اقول اني ليا عند هاني اسامة المنتج 40 الف جنيه من ۲۰۱٨ و كل ما اكلمة يقولي اني مش معايا فلوس».

وأضافت، «انا كمان مش معايا فلوس يا هاني بس مش بقول انت شغال ماشاء الله .. أنا لا شكراً أنا هسيب الرسالة دي هنا».

أخر أعمالها فيلم «الرجل الأخطر» مع الفنان سامح حسين، وقد حققت من خلاله نجاحاً كبيراً.

رحمة حسن تتصدر التريند بعد شكواها ضد هاني أسامة .. وفنانون« لينا فلوس عنده»

رحمة حسن لـ المنتج هاني أسامة : «ليا عندك 40 ألف من 3 سنين»