رسالة مؤثرة من نشوى مصطفى بعد وفاة زوجها: 33 سنة مبعدناش عن بعض

وجهت الفنانة نشوى مصطفى رسالة مؤثرة بعد وفاة زوجها، وتشييع جثمانه أول أمس السبت 28 ديسمبر الجاري.

كتبت نشوى مصطفى في منشور عبر حسابها الرسمي بموقع فيس بوك: «سترتني ربنا يسترك، وأكرمتني ربنا يكرمك، سيبت لي أجمل هدية ولادنا ربنا يهاديك بالفردوس الأعلى».

رسالة نشوى مصطفى بعد وفاة زوجها

وتابعت: «33 سنة ستر وكرم ومحبة ومودة ورحمة، علمتني إزاي أكون من المتصدقين.. علمتني إزاي أكون دايمًا في معية الله.. علمتني إزاي تكون عزة النفس.. علمتني إزاي أتسامح حتى مع اللي أذاني.. علمتني إزاي أتوكل على الله في كل شئوني».

واستكملت نشوى مصطفى قائلة: «علمتني إزاي أكرم ضيفي.. علمتني معنى التواضع مع عباد الله الضعفاء، يا نبيل الأخلاق يا ابن الأصل العالي.. نسيت تعلمني إزاي أقدر أعيش من غير وجودك».

نشوى مصطفى وزوجها

وفاة زوج نشوى مصطفى

وأضافت: «33 سنة مبعدناش عن بعض لحظة.. 33 سنة ذكريات وحياة بحلوها ومرها.. 33 سنة كنت خير زوج وخير أب.. 33 سنة أكرمتني وسترتني وجبرت خاطري وربيت عيالنا أحسن تربية».

واختتمت نشوى مصطفى: «ليه يا عماد سيبتني لوحدي كده.. ما استاهلش منك تسيبني لوحدي، ده أنا مبعرفش أعمل حاجة في الدنيا، أنت اللي كنت بتعمل لنا كل حاجة.. أنت اللي سندتني في كل ظروف حياتي الصعبة، في شدتي وفي مرضي شيلتني وطبطبت عليا، ياه على غلاوتك يا عشرة عمري، ياه على غلاوتك يا أبويا وأخويا وحبيبي وجوزي وابني، بموت يا عماد، بموت وأنت مش قدام عيني، هكمل إزاي يارب من غيره، ادعو له بالرحمة وادعولي بالصبر وادعو لولادي بالصبر والثبات».