زينة تهاجم المتنمر على يسرا اللوزي: «معدوم القلب والضمير»

شنت الفنانة زينة هجومًا حادا على المتنمر الذي وصف الفنانة يسرا اللوزي بـ«أم الطرشة»، وأعادت «زينة»نشر رسالة التنمر ورد يسرا اللوزي عليه.

وعلقت، عبر حسابها على «إنستجرام»: «عارفين يعنى إيه أم، يعنى حب وتضحية ومعاناة وعطاء وتعب ومسئولية وحاجات كتير مالهاش وصف، عارفين يعنى إيه طفل أو طفلة، يعنى مستقبل وحياة وعمر جاى وتفاؤل وحب، عارف يعنى إيه تعاير طفلة يعنى الشيطان نفسه يخجل إنه يعمل كدة، يعنى أنت لا شيطان ولا بنى آدم، أنت حاجة مالهاش وصف».

وأضافت زينة: «أنت مخلوق ضعيف ومريض مرض مالوش تشخيص، لأن أي مخلوق حتى الشيطان أشرف منك أنت وأمثالك مكانكم المجارى، ولو أن المجارى فيها كائنات حية أشرف منك.. الطفلة دى ميزها ربنا واختبر أمها اختبار صعب، نجحت وجاهدت وحاربت واشتغلت علشان تقف جنب بنتها اللى مايشرفهاش تعرف أمثالك، منك لله وربنا هو اللى قادر ينتقم منك يا معدوم القلب والضمير والرحمة والإنسانية».

واختتمت زينة قائلة: «الصم والبكم هم ضمائرنا لا غير، يسرا اللوزى.. أنا فخورة بك جدا، ربنا يخليلك بنتك وتشوفيها أحسن بنت في الدنيا».

وكتبت «اللوزى»، ردًا على أحد التعليقات التى وصفت بنتها بـ«الطرشة»، «شكرًا على ذوق حضرتك، أنا قررت استغل كلامك اللطيف عشان أقدم شوية توعية بخصوص هذا المصطلح، أولا المصطلح الصحيح والمقبول هو الصم وضعاف السمع وليس الطرش أو البكم، ثانيًا أحب أعبر عن فخرى بكونى والدة طفلة صماء، لأنها علمتنى حاجات كتيرة جدا وبقيت بنى آدمة وأم أحسن بسببها، وأنا متأكدة إنها هتطلع إنسانة مثقفة ومتفوقة ومش هتبقى محتاجة مساعدة من حد عشان تحقق أحلامها».

وأضافت،«ثالثًا.. البنت الصماء دى هى اللى ألهمتنى انى أتكلم فى البرامج وأطالب بالكشف المبكر للمواليد اللى على أساسه كل المصريين هيتعملهم كشف سمع عند الولادة، وده المفروض يساهم بشكل إيجابى فى حياة عائلات كتير وهيسمح للأطفال الصم وضعاف السمع، إنهم يلاقوا الدعم منذ الصغر عشان يقدروا يتعلموا كويس ومايبقوش عبء على حد، بل بالعكس هيكونوا قادرين يندمجوا فى المجتمع (المريض للأسف».

واختتمت يسرا اللوزى ردها قائلة: «الطفلة الصماء دى، ليها إنجازات أثرت على شعب كامل، رغم إن عمرها 6 سنين، ياريت توضحلى بقى.. حضرتك أنجزت إيه فى حياتك؟.. شكرا».

سمير فرج: مصر تشتري السلاح الروسي بأموالها.. والمعونة الأمريكية لم تدخل خزينة الدولة منذ 40 عاما.. فيديو

هاني الناظر: «مسؤوليتنا عدم انتظار صدور قرارات عقابية للحفاظ على صحتنا.. العقل زينة»