شقيق زوجة مسن السويس يكشف تفاصيل صادمة: «الحاج غريب ما بيعرفش يقول لفظ خارج»

في أول ظهور إعلامي له بعد انتشار فيديو صفع الحاج غريب على يد مالك العقار، كشف الأستاذ محمد، شقيق زوجة المسن الستيني، تفاصيل مثيرة عن الواقعة التي هزت مواقع التواصل الاجتماعي.

شقيق زوجة مسن السويس يكشف تفاصيل صادمة

وقال محمد في تصريحات له، إن الحاج غريب ده ما بيعرفش يقول لفظ خارج، ما بيعرفش يشتم، ما بيعرفش يهزر بلفظ وحش'، مؤكدًا أن المسن البالغ من العمر 66 عامًا لا يستحق هذا الاعتداء الوحشي.

بداية النزاع.. محاولات فاشلة للحل الودي

روى محمد تفاصيل بداية الأزمة قائلاً: 'في البداية كان فيه مشاكل وخلافات بخصوص الشقة وهي شقة إيجار قديم، وحصل اشتباكات بين ابن الحاج غريب واللي اسمه محمد، وبين علي صاحب العقار'.

وأضاف: 'جابوا فيديو وقالوا إن الفيديو ده لابن الحاج غريب وهو بيسرق الشقة، قلنا لهم مش هو يا ابني ده، لا هيئته ولا وضعه ولا شكله باين، فقالوا لا هو هو بالعافية يعني'.

تصعيد خطير وتهديدات بالإخلاء القسري

وتابع محمد: 'قالوا لنا بلغوا الشرطة، جات الشرطة وعملوا محاضر، وفي النيابة تم الصلح وكل واحد اتنازل عن محضره، بس آخر النهار راحوا لجوز أختي وأختي وقالوا لهم: أنتو لازم تسيبوا البيت، ولو ما سبتوش احنا هنعمل كذا وكذا'.

وأوضح أن الأسرة تقطن في الشقة منذ 35 عامًا بنظام الإيجار القديم، مما أثار غضب مالك العقار الذي يحاول إخلاءهم بالقوة.

محاولة التفاهم تتحول لعنف

وكشف محمد: 'رحنا نتفاهم معاهم، كلمنا عاصم الأخ الكبير قلنا له تعالى نقعد ونتكلم ونحل الموضوع، قالوا لا الموضوع منتهي ومفيش كلام فيه'.

وأضاف: 'الحاج غريب قال خمسة أيام وهرد عليكم، كلمناه تاني قال تعالوا البيت، رحنا البيت، أول ما جه من تحت وقف قدام البيت وهو يقول: أنا جيت وأنا عايز فلان وفلان يطلع محمد غريب للشقة'.

تصعيد عنيف على السلم

وروى محمد مشهدًا مرعبًا قائلاً: 'بدأ عاصم يطلع السلم وهو بيقول: أنا أطلع أرميه من فوق، أنا أطلع أولع فيكم، طالع يتهجم علينا، الناس حاوشت على السلم، وكل الفيديوهات دي موجودة معايا'.

وأضاف: 'أول ما شافني عاصم راح ضربني في وشي على طول، أنا بصراحة رديت عليه، وقامت عركة والناس حجزتنا، وطلعنا فوق في الشقة، بدأوا يترزوا على الباب عشان يكسروه ويدخلوا علينا، وأنا وولاد أختي أفلنا الباب بأجسامنا'.

اعتداء على فتاة بمفردها في الشقة

وفي تطور خطير، كشف محمد: 'وإحنا في الطريق للقسم جالنا تليفون إنه اتهجم على بنت أختي كانت لوحدها في الشقة، دخل عليها وكسر باب الأوضة وكان عايز يضربها لولا إن الناس حاشت'.

وأضاف: 'أختي سمعت وطلعت، لما دافعت عن بنتها راح ضربها، وابنها كان معاها يدافع عن أمه راح ضربوه بمطواة وجرحوا إيده، أخد 3 غرز وفيه تقرير طبي بالموضوع كله'.

واقعة الصفع الشهيرة صباح الجمعة

وعن الفيديو الذي انتشر بشكل واسع، قال محمد: 'يوم الجمعة الصبح بعد الصلاة، الحاج غريب كان رايح يجيب العلاج من البيت، كان محتاج يدخل، عاصم ده منعه وأفلين الباب بالجنزير، وقال له مش هتدخل'.

وأضاف: 'أخوه التاني مسك مطرق وحصل الصفع اللي حضراتكم شفتوه في الفيديو، وطبعًا زوجة أختي كانت بتصور وبعدها اتصلت بينا وبالشرطة'.

الحاج غريب مريض ويخضع لغسيل الكلى

وأكد محمد على الحالة الصحية الحرجة للمجني عليه قائلاً: 'ده راجل 66 سنة، تعبان، بيغسل كلى، عنده ضغط وسكر ومشكلة في القلب، تضربوه بالطريقة الهمجية دي؟'.

وأضاف: 'إحنا دلوقتي قدام مركز الغسيل، هو هيجي دلوقتي من القسم إن شاء الله وهيغسل'.

رفض قاطع للتنازل عن المحاضر

وعن إمكانية التنازل، قال محمد بحسم: 'لا، مرفوض طبعًا، مفيش تنازل، حتى لو الحاج غريب اتنازل، أنا في المحضر، أختي في المحضر، ابن أختي في المحضر، احنا مش هنتنازل'.

القبض على المتهم وثناء على الأجهزة الأمنية

واختتم محمد حديثه قائلاً: 'أنا أحب أشكر الرجال الأمنية، من ساعة ما شافوا الواقعة وما حصل للحاج غريب بصراحة ما توانوش لحد ما جابوه الحمد لله'.

وأضاف: 'ده كان وعد رئيس المباحث، قال أنا هجيبه، والحمد لله كان راجل وقد كلمته، هو حاليًا دلوقتي محبوس في القسم، وإن شاء الله بكره هيروح النيابة الصبح'.