شيرين رضا: قدمت عرض راقص أمام مبارك وهسأل ربنا ليه الناس معندهاش رحمة

كشفت الفنانة شيرين رضا أسرارًا وحكايات عن حياتها، موضحة أنها عاشت في منزل والدها أول 17 عامًا من عمرها.

وتابعت شيرين رضا عبر تصريحات تلفزيونية، أنها سافرت الولايات المتحدة الأمريكية لاستكمال دراستها، وعادت مصر وتزوجت من الفنان عمرو دياب.

بدايات شيرين رضا

وأشارت إلى أنها كانت تذهب وهي صغيرة مع والدها الفنان الراحل محمود رضا، لحضور عروض الرقص معه، مضيفة: «كان في بنت غايبة من الفرقة وبابا قالي اقفي مكانها.. وكان في عرض راقص قدام الرئيس الراحل مبارك، ويومها بابا لقاني جيت وسألني جاية ليه؟ قولتله عشان أقف مكاني وقولتله إني عايزة أشارك في العرض ده، واتدربت قبلها حوالي شهرين».

وأكدت شيرين رضا أنها لم تكن تطمح بأن تعمل كممثلة، ولكن الأمر جاء بالصدفة، بعدما تلقت اتصالًا هاتفيًا من الفنان الراحل عزت أبو عوف يسألها عن رأيها في المشاركة بعمل سينمائي، لافتة إلى أنها كانت تشعر بالملل فقررت الموافقة، وتابعت قائلة: «أول مرة أمثل كنت في الغردقة وكلمني عزت أبو عوف قالي مش عايزة تمثلي.. وأنا كنت زهقانة قولت له آه.. وده كان أول فيلم (حسن اللول) مع أحمد زكي، وقالي لو عايزة تجربي تمثلي تعالي نتقابل وروحت قابلته هو وأحمد زكي وأنا كنت عرفاه قبلها، فمكنتش خايفة منه بالعكس هو كان بني آدم ظريف جدًا وساعدني، والتجربة دي مكنتش مدروسة ولا كنت حباها، ولكن كان اختيار من المخرج وأحمد زكي قالوا نجرب نسألها وعملت معاه (حسن اللول) وبعد كده فيلم نزوة بينهم حوالي شهرين، لكن فيلم نزوة اتعرض الأول».

وعن تأثير السوشيال ميديا على حياتها، قالت شيرين رضا: «ساعات وأنا قاعدة باكل الاقي حد بيخبط على كتفي وعايز يتصور معايا.. وأنا مش لطيفة خالص أنا ممكن أكلهم، حقيقي التليفون والكاميرا جننوا الناس وخلوهم يفتكروا أن المشهورين ملكهم يتصوروا معاهم أي وقت».

تصريحات شيرين رضا

كما انتقدت شيرين رضا مقولة «كل عيل بيجي برزقه»، معلقة: «أنا شايفة أن ده غلط.. ولما ييجي الطفل مش نحط عليه مسؤولية ونقول ذاكر وفي الصيف اشتغل عشان تساعد.. طيب أنت جايبني ليه في الدنيا طالما أنت معذبني كده، الفكر ده لازم يتغير».

واستكملت: «لما ابقى قدام ربنا هسأله ليه الناس معندهاش رحمة؟ ليه في عنف بين البني آدمين وليه منرحمش بعض ونرحم الحيوانات؟».

شيرين رضا