طبيب البعثة يكشف موقفين رائعين لـ الجندي وسارة..الاتنين دهب خالص

كشف حسن كمال، رئيس اللجنة الطبية للبعثة المصرية في أولمبياد باريس، عن موقفين رائعين للثنائي المصري أحمد الجندي، المتوج بذهبية الخماسي الحديث، وسارة سمير، المتوجة بفضية رفع الأثقال في أولمبياد باريس 2024، يؤكد جدارتهما بحمل العلم المصري في الأولمبياد.

قال حسن كمال عبر صفحته الشخصية على موقع التواصل الاجتماعي «فيسبوك»:' عن جمال الذهب والفضة.. أحمد الجندي لما أتبلغ انه هيشيل العلم في الافتتاح كان في معسكر في دولة تانية.. جه شال العلم في طابور العرض وسافر تاني الصبح لمعسكره علشان يكمل .. كان ممكن يعتذر عن الحضور أو يقول خلاص بقى فاضل كام يوم نكمل في فرنسا .. لكن دي الحقيقة عقلية وشخصية البطل .. وفي نفس الوقت احترامه لبلده وتقديره لرفع علمها'.

أضاف:' سارة سمير اتصابت في رسغ أيدها قبل اللعب بخمسة أيام .. جت على عيادة البعثة وأول كلمة قالتهالي لو سمحت يا دكتور ما تقولش للمدربين .. سألتها عن السبب فقالت بالحرف .. بيقلقوا عليا جامد وأنا مش عاوزاهم يقلقوا .. قلتلها طيب وأنتي مش قلقانة؟ قلتلي لأ.. انت بس قلي عادي وأنا هاشيل .. وشالت !!'.

أتم:' أحمد كان ممكن يعتذر عن طابور العرض وكان الكل هيقدر.. وسارة كان ممكن تعلن اصابتها احتياطي علشان يبقى في عذر أو تعاطف .. لكن الأبطال والناس زي الميداليات كده .. معادن وهما الاتنين دهب خالص !.. مبروك يا شباب'.