عايدة غنيم: فقدت النطق 40 يوما بعد مقتل والدتي ومش عارفة اشتغل في بلدي

كشفت الفنانة عايدة غنيم حقيقة اعتزالها الفن بعد مقتل والدتها، موضحة السبب في غيابها الفترة الماضية.

قالت عايدة غنيم عبر تصريحات تلفزيونية: «أنا معتزلتش الفن ولكن الصدمة نفسها بتاعة الموقف لما حصل كنت وقتها شغالة مسرح، وفقدت النطق 40 يوم وقعدت في المستشفى الأحبال الصوتية مبتكلمش».

حقيقة اعتزال عايدة غنيم

وتابعت: «وطبيعي أني بعدت لأني نفسيًا مكنتش مؤهلة، ولغاية فترة قريبة مكنتش بتكلم عن قتل والدتي ولا بحب حد يجبلي سيرته أنا فعلًا الفترة الأخيرة دي مشتغلتش كتير في مصر، ولكني اشتغلت برا مصر، وأنا بيصعب عليا جدًا أني مش لاقية نفسي وأني اشتغل في تلفزيون بلدي وأشتغل برا».

واستكملت الفنانة عايدة غنيم حديثها قائلة: «وأنا اتكلمت كتير مع النقابة إني عايزة أشتغل، لأن المخرجين الجداد ميعرفوش حاجة عن الناس القديمة، وهما ميعرفوش عايدة غنيم، وبيستسهلوا وبيجيبوا اللي موجودين دلوقتي وفي ناس كتير بيشوفوني إحنا فاكرينك اعتزالي، لأ يا جماعة أنا معتزلتش ولكن أنا مبعرفش أرفع سماعة تليفون على حد معرفوش وأقول له أنا عايزة أشتغل».

عايدة غنيم

تصريحات عايدة غنيم

وأضافت: «ولكن ده ممكن أعمله مع المخرجين اللي اشتغلت معاهم بتصل بيهم في الأعياد، ولكن معظمهم مبيشتغلوش، وبداياتي كانت في الفن الاستعراضي مع أستاذي عادل عبده، وده قبل التمثيل، ودخلت مسرحية ألاباندا مكان الفنانة منى عبد الغني، كنت في الفرقة الاستعراضية في المسرحية».

وقالت عايدة غنيم أيضًا: «ولكن لما جت فجأة اعتزلت مكنوش عارفين يتصرفوا والنجم علاء ولي الدين كان شايف فيا حاجة وقالي ليه متمثليش؟ دمك خفيف، وسبحان الله قالهم عايدة تعمل الدور لغاية ما نشوف بطلة أو نجمة تشيل الدور وأول عمل ليا كان مسلسل الحاج متولي، ومكنتش مستوعبة وقتها أني همثل، وتفاجأت أن الفنانة عايدة رياض حبيبتي بتكلمني وأنهم عايزين بنوتة صغيرة بتعمل دور بنت الأستاذ نور الشريف في مسلسل الحاج متولي».

وفيما يخص ذكرياتها مع الفنان نور الشريف، قالت: «ولما روحت قالوا هي فيها شبه من بطة ونعمة الله، إحنا نديها دور سعدية، وأنا افتكرت أني هكون الشغالة في المسلسل، وزعلت جدًا وخرجت بعيط، وعايدة رياض قالتلي أعملي أي حاجة مع الأستاذ نور الشريف وفي رمضان هتفرق معاكي، وسبحان الله، وكنت خايفة من اسم سعدية وكان وش السعد عليا».

واختتمت عايدة غنيم: «بعد مسلسل عائلة الحاج متولي، اتنكت على الأدوار وده اللي قعدني في البيت، لغاية لما في الآخر مقربين ليا قالوا مينفعش وأنتي لسة في البداية، ولكن مسلسل الحاج متولي وفر عليا 5 أعمال أعملهم علشان وشي يتحفظ، ولغاية دلوقتي الناس بتفتكرني بالحاج متولي».

عايدة غنيم

عايدة غنيم