علاء مرسي يكشف عن مشروعه لاكتشاف مواهب أطفال الشوارع

كشف الفنان علاء مرسي عن مشروعه الفني والاجتماعي لمساعدة أطفال الشوارع واكتشاف مواهبهم، مشيرًا إلى موقف مؤثر تعرض له مع أحد الأطفال الذي حاول سرقته في البداية، لكنه تحول لاحقًا إلى شاعر موهوب بفضل دعمه.

قال علاء مرسي في تصريحات تلفزيونية: "أنا جريت ورا المواهب اللي في الشارع وكونت فرق ومجموعات، وفي مرة كنت ماشي بالعربية في محافظة معينة، وفجأة طفل دخل عليا وكان عايز يسرقني، لكنه لما عرفني، رحب بيا".

وأضاف: "قلت له خد اللي أنت عايزه بس أنت صعبان عليا، وعرفته أني هنا علشان أساعده، ولما سألته لو يحب يجي معايا، قالي إنه شاعر، وبدأ يقولي شعر أقرب إلى الزجل أخدته معايا، لكن في أول بروفه لقيت كل الموبايلات اختفت مسكته وقولت له رجع الموبايلات، وقالي إنه كان هيبيعهم بـ700 جنيه، فقلت له هاخدهم وهديك الفلوس، بس ترجعهم، ودلوقتي بقى من أهم أعضاء الفرقة وبقى شاعر شاطر جدًا، وليه قصيدة منشورة في ديوان".

وتحدث علاء مرسي عن دور الفنان في المجتمع، مؤكدًا أن الفنان يجب أن يكون له تأثير إيجابي، قائلاً: "الفنان يعمل المشاريع اللي هو عايزها، لكن لازم يكون عنده مسئولية تجاه المواهب الأقل منه، والمجتمع اللي هو فيه، الأطفال اللي مرمية في الشارع عندهم مواهب، حتى لو الدولة بتساعدهم، أنت ليك دور مجتمعي حتى لو هتعمله في الخفاء".

يُذكر أن علاء مرسي شارك مؤخرًا في الجزء الثالث من مسلسل "موضوع عائلي"، الذي تكون من 10 حلقات، وحقق نجاحًا كبيرًا بين الجمهور.