فنجان قهوة كلفه نص مليون جنيه.. زوج يروي تفاصيل مأساته مع زوجته بسبب القائمة

روى عمرو تفاصيل خلافه مع زوجته التي لجأت إلى وضع مادة مخدرة في القهوة، لإرغامه على التوقيع على قائمة منقولات بما يتنافي مع اتفاقهما المسبق قبل الزواج.

وقال عمرو خلال لقائه مع الإعلامية نهال طايل، ببرنامج «تفاصيل» على قناة صدى البلد 2 «أول خلاف حصل مع زوجتي بعد حفل الزفاف بفترة قصيرة، و كانت حامل في الشهر الثاني، فاتفقت معاها وقتها إن الخلاف أمر طبيعي، فلو فيه مشكلة هتحصل في يوم بسبب خلاف طبيعي عرفيني عشان منكملش الحمل ونأجل قرار الإنجاب، فأكدت حينها أنه لن يحدث أية خلافات بيننا»، متابعا «أنا حياتي في ولادي وحاولت أشوفهم دلوقتي بكل الطرق الودية ورفضتها، قالتلي لما تنفذ اللي أنا عايزاه الأول».

معاناة زوج مع قائمة المنقولات

وأضاف عمرو «رفضت أرفع قضية رؤية، لأني لا أريد أن أضع اسمي وأسماء أبنائي في حكم محكمة»، مردفا «ما حدث أنني لم أوقع على قائمة في بداية الزواج عام 2017 لأننا في عيلتنا مش بنعمل قايمة حتى في للبنات، قولتلها متقارنيش نفسك بشوية خشب، وزوجتي جهزت ليا قهوة ووضعت فيه مادة مخدرة، بعد ما شربت القهوة دخلت في نوبة ضحك، وقولت أنا مش همضي على الهبل ده خالص، كنت مش في وعيي وروحت ماسك القلم وماضي على القائمة بـ 400 ألف جنيه».

وواصل عمرو «أنا اللي اشتريت الأثاث، واتجوزنا صالونات بدون قائمة، قبل ما تمضينا على القايمة كان فيه بينا مشاكل لمدة سنة كاملة، وقتها مريت بأزمة مالية فتركتني وغادرت لمنزل والدها لمدة 12 شهرا، ووافقت لأني مكانش عندي خيار تاني، وقت ما حصل الخلاف كان ابني عنده سنة ونصف، وبنتي 6 شهور».

وأكمل عمرو «والدة زوجتي وراء الأزمة وهي من حرضتها لترك المنزل خلال أزمتي المالية، منحتها مهلة للعودة إلى البيت بدون شروط، في شهر فبراير عام 2022 بعتتلي رسالة وقالتلي أنا في البيت مع الولاد، وفرحت جدا، لكن قبل ما أرجع للبيت اكتشفت إنها رفعت عليا دعوتين نفقة، طلبت مني تسجيل مبلغ مالي باسمها في مكتب التسوية بمحكمة الأسرة فوافقت، والموظفة حذرتني وقالتلي يابني محدش بيعمل الورقة دي غير المطلقين، واستمريت 4 شهور على هذا الوضع بمنحها مصاريف الشهر والحصول على إيصال، كأننا مطلقان، وبعد فترة طلبت مني الإمضاء على القائمة، فرفضت وقولتلها انسي».

واستطرد «في يوم الواقعة قالتلي أخويا جايب قهوة مستوردة من برا، عملت فنجانين قهوة، وبعد ما شربت دخلت في نوبة ضحك ووقعت على القائمة بدون وعي، وبعد الأزمة خرجت مع أشقائها وإخوتي وفضلوا برا البيت للساعة 3 الفجر، فاختلفنا ووجهت لها سباب فردت عليا بنفس الشتيمة»، مختتما «هيا مش قادرة تعرف أنا عايز إيه، عايز أربي ولادي في وسط أب وأم، أنا معملتش فيكي حاجة وحش، عايز أرجع تاني عشان ولادي ملهمش ذنب، هسامح في أي حاجة حصلت، أبوس إيدك انسي نفسك وفكري في ولادك».