قصة لقاء جمع بين عزت العلايلي وعمر الشريف.. تفاصيل

يحل اليوم الأحد 5 فبراير، ذكرى وفاة الفنان الكبير عزت العلايلي الذي رحل عن عالمنا عام 2021 ، بعد مسيرة فنية طويلة وعطاء فني كبير امتد لسنوات عديدة.

وقال عزت العلايلي في لقاء تليفزيوني سابق: الكاتب الكبير نجيب محفوظ كان صديق مقرب جدا لي وكنا بنحب بعض جدا، وعزت العلايلي كان بينافس عزت العلايلي ومكنش بينافس حد، ولما بعمل فيلم وانج فيه أوي  كنت بقلق، وأنا جه عليا وقت واتغريت شوية.

عزت العلايلي يتحدث عن عمر الشريف

وتابع: قابلت عمر الشريف الله يرحمه، وقعدت معاه 3 ليال، وهو فنان جميل جمال غير عادي وعنده احساس تلقائي ولا يتعاظم ولا يتكبر وكان متواضع لآخر يوم، وقولتله (كل الأعمال اللي عملتها دي يا عمر، أنا لو منك هكون مغرور أوي).. فقالي (ولا حاجة، بالعكس لو مريت بالتجربة اللي أنا مريت بيها معرفش هتحس بايه.. هتحس انك خدت العالم كله بايدك، واتضح انك مش هتلاقي حاجة في ايدك) ودي فلسفةعظيمة جدا.

وأضاف: عمر الشريف كان بسيط جدا جدا وكان من أظرف وأبسط وأرق الناس، وفنان كبير جدا، وتاريخه عظيم، وسعيد جدا اني اشتغلت معاه في حياتي.

وكان عزت العلايلي تحدث أيضا عن زوجته الراحلة قبل وفاته، قائلا: الدنيا كلها مش مظبوطة، أنا وسناء الله يرحمها عشنا مع بعض سنين كتير من 1963 وحتى عام 2017 .. عمر تاني ورحلة ومشوار طويل وأنا كنت مدلل عندها، ومكنش ليا علاقة بالبيت وسابتني أبدع في أعمالي الفنية وكانت واخدة بالها من البيت.

عزت العلايلي استكمل حديثه عن زوجته: دايما كانت بتدعيلي، وبتصلي مخصوص عشان ربنا يوفقني وفقدانها تعبني ولاذلت متأثرا بها، وفقدت روحي كلها وكل أعمالي اللي قدمتها كانت بتحبها ، وكانت بتفضل جنبي من غير ما تنام لحد ما تهيألي جو الراحة والهدوء لو حست اني مضايق، ومكنتش شايل مسئولية البيت معاها وكنت سايب ايديا.

العلايلي، أضاف خلال حديثه: مكنش عندنا بين بعض مشاكل الزوجين اللي بنسمعها، ومحصلش اي مشاكل بينا قبل كدة، وهي مكنتش بتعملها ولا ليها دعوة بأي حاجة ممكن تزعلني أو تضايقنا من بعض وكانت بتعمل المستحيل عشان تسعدني في حياتها.

انطلاقة عزت العلايلي

الفنان عزت العلايلي حاصل على بكالوريوس المعهد العالي للفنون المسرحية عام 1960، لكنه لم يبدأ مسيرته التمثيلية فور تخرجه بسبب رعايته لأخواته الأربعة بعد وفاة والده، فعمل لفترة كمعد برامج تلفزيونية، قبل أن تأتيه الفرصة من خلال فيلم (رسالة من امرأة مجهولة) عام 1962 والذي كان بمثابة بدايته السينيمائية.

أعمال عزت العلايلي الفنية

تعددت أعماله بعد ذلك ليشارك في عشرات الأعمال ما بين السينما والتلفزيون، أحد أهم أدواره كان في فيلم (الأرض) عام 1970 من إخراج يوسف شاهين، ومن أبرز أعماله (الطريق إلى إيلات، أهل القمة، المنصورية، التوت والنبوت)، وفي المسرح شارك في عدة مسرحيات من أهمها (أهلا يا بكوات، ثورة قرية).