لبلبة تروي لحظات صعبة من الطفولة حتى النجومية: قعدت 15 يوم مش بتكلم

تحدثت الفنانة لبلبة عن أصعب اللحظات التي مرت بها في حياتها، خاصةً بعد وفاة والدها ووالدتها، حيث تعتبر رحيلهما أكبر صدمة في حياتها.

قالت لبلبة عبر تصريحات تلفزيونية: «فقدت أخويا الكبير، ووالدي توفى في المطار، وكان لازم تاني يوم أطلع في حفلة مذاعة على الهوا، وأغني للناس على مسرح سينما قصر النيل».

أصعب لحظات في حياة لبلبة

وتابعت: «ورجعنا من الدفنة وعملت مكياج وضحكت الناس، وعملت أحلى فقرة وبعدها عيطت كتير، وأكبر صدمة كانت وفاة والدتي، وقعدت 3 سنين لابسة أسود، وقلعت الأسود أما سمعت كلام جمهوري، كنت بعالج والدتي في باريس، والدكتور الفرنساوي قال قدامها من 4 لـ 6 سنين، لكن توفت بعد 9 سنين».

واستكملت لبلبة: «أنا مش بس فقدت أهلي، فقدت أصحابي، المخرج الكبير عاطف الطيب اللي طلعني بشكل مختلف طول عمري الفني وأخذت جوائز، وفقدت وحيد حامد وأحمد زكي ونور الشريف ومحمود عبد العزيز ودكتور رفيق الصبان».

طفولة لبلبة

وفيما يخص أصعب المواقف التي مرت عليها في طفولتها، قالت: «كنت مشاركة في حفلة هيحضرها الرئيس جمال عبد الناصر وكان معايا عبد الحليم وحفلة كبيرة جدا ووالدتي كل شوية توصيني عليها وتقولي أصلها هتتذاع في التلفزيون وعايزة كله ينبهر بيكي وأما طلعت على المسرح حييته».

وأضافت لبلبة: «وجيت أغني مطلعش صوتي وأقول للمزيكا عيدوا مفيش صوت، من كتر ربكتي منطقتش وقفلوا الستارة وقعدت أعيط وقالوا حصلها كرامب والحدث كان مؤلم جدًا وقعدت 15 يوم مش بتكلم وكنت خايفة أفقد صوتي».

أما عن وصية والدته لها قبل وفاتها، قالت: «قالتلي لو مت متعشيش في البيت ده ومتقدميش تنازلات في الفن احترمي المشوار بتاعك إنتي مش قليلة وإوعي تعملي أدوار صغيرة، ولكن أنا مسبتش البيت لحد دلوقتي لسة ساكنة في شقتي الصغيرة في التحرير بالقاهرة ومحتفظة بكل حاجة هي سابتها حتى عفش الشقة القديم وصورتي اللي هي كانت حطهالي وكله بيقولي أمشي بس أنا حساها معايا فيها».

لبلبة