لقاء سويدان: ظلمت نفسي وإهانة المسرح سبب مشاكلي مع ميدو عادل

تحدثت الفنانة لقاء سويدان عن تفاصيل جديدة بشأن خلافها مع الفنان ميدو عادل، أثناء تقديم مسرحية سيد درويش.

قالت لقاء سويدان عن خلافها مع ميدو عادل عبر تصريحات تلفزيونية: «هرد وباختصار لأن الموضوع أخد أكبر من حجمه من ناحية إني ممثلة مسرح وكنت الأولى على دفعتي لمدة 4 سنوات واشتغلت مع أعظم نجوم مصر في السينما والمسرح والتلفزيون من أول سعاد حسني وأحمد زكي مرورًا بأكبر نجوم موجودين واتوفوا والفترة دي الحمد لله دي كلها اتربيت على حاجات معينة وأساسيات مقدرش أغيرها بمعنى مقدرش أكون في مكان وحاسة أن المسرح بيتهان».

خلاف لقاء سويدان مع ميدو عادل

وتابعت: «يعني لما نطلع نحيي الجمهور بشورتات يبقى كدا بنهين المسرح وبنهين الناس لما نجيب أطفال نطلعهم في مشهد لا يصح ولا تليق بالأطفال يبقي كدا بنهين الطفولة ولما نكون بتمثل فترة زمنية بتاعه سيد درويش سنة 1919 ناس بفساتين جينز وكوتشيات يبقي إحنا كدا بنهزر فكان عندي مشكله وتحفظات على أكتر من حاجة ومشكلة مع المخرج وأحد المخرجين المنفذين وميدو لأني اعترضت بشكل كويس أول مرة وتاني مرة وتالت مرة».

واستكملت الفنانة لقاء سويدان قائلة: «لقيت مفيش أي استجابة وأنا كواحدة عارفة يعني إيه التزام ويعني إيه رولز تقدمت بشكوى للأكبر مني سلطة محصلش فصل فيها وتقدمت للشئون القانونية والكلام دا كان من يوم 16/8/2023 والشكوى أحيلت إلى الشئون القانونية يوم 26/8 والمشكلة حصلت يوم 23/9».

لقاء سويدان

تصريحات لقاء سويدان

وأضافت: «يعني فيه شهر قبل المشكلة من المشاكل وحاجات كتير جدًا أنا مقدرش أطلع فيها لأننا مش في خناقة في شارع والبني آدم يرد بقدره يعني لما حد يشتمني أنا مش هرد زي الحد دا ماعمل أنا هرد بقدري وأنا لم أصرح أني صفعته اللي قال هو الطرف الآخر وقال حاجات كتير قوي وأنا مقدرش أتكلم على أي حاجة غير قدام النيابة الإدارية ونقابة الممثلين ولما الموضوع تطور اتضطريت الجأ إلى النيابة العامة لأن فيه حاجات لن أتهاون فيها وأنا عندي كل ما يثبت كلامي من صور وفيديوهات وشهود يثبتوا كلامي وعندي أدلة كتير جدًا مينفعش أخرجها السوشيال ميديا».

وقالت لقاء سويدان أيضًا: «لأني لجأت للقانون وحذرت كتير وقولت ياجماعة مينفعش كدا وإن عودتم عودنا والمخرج قال دي رؤية مخرج ولو دي كانت رؤيته مكنتش وافقت عليها من الأول لأن كان بقالها 4 سنوات ناجحة ومينفعش أشوف ناس بتحط تراب على الطبق اللي هتاكل منه وأقول دا هزار أنا اشتغلت مع أعظم النجوم في المسرح مع الأستاذ نور الشريف عمري ماشوفته بيقول إنتم كذا وأنا النجم مكنش الأستاذ نور كل يوم يعملنا اجتماعات وكل يوم ألاقي كلام جديد على المسرح بيتقال وتجاوزات أنا مقبلهاش».

أسرار لقاء سويدان

وتابعت: «وحكاية الأطفال المعاقين دي حاجة لا يقبلها الله من فوق سبع سموات ودي حاجة عيب وأتحدى أي صورة أو فيديو إني بتعامل بشكل وحش مع الأطفال لما كانوا على المسرح والناس كلها كانت بتصور طلعولي صورة من موبيلاتكم إني عملت كدا ولو أنا شيطان بقرون وديل مش هعمل كدا مش بعمل كدا بيني وبينهم يبقى هعمل كدا قدام الجمهور! وأنا لما جالي برنامج أول حلقة عملتها في برنامجي كانت عن ذوي الاحتياجات الخاصة ونشاطاتي في الموضوع دا بقالها سنين واللي بيحصل دا معمول بقصد، علشان تصدر صورة سيئة عني وأنا بقالي 39 سنة بشتغل ومفيش حاجة هتهدني بالسهولة دي».

وتحدثت لقاء سويدان عن الأدوار التي عُرضت عليها أثناء دراستها، قائلة: «أتعرض عليّ أدوار كتير وأنا في المعهد، ومعظم الأدوار كانت إغراء وكنت برفضها لإني كنت طويلة وملامحي توحي بإني أكون ممثلة إغراء ولكن كنت برفض وكانت السينما في الوقت دا مفتوحة أكتر ومشاهد اجرأ عكس الفيديو كانت التلفزيون قناتين فقط وتحت رقابة شديدة ومش ندمانة خالص لرفضي هذه الأدوار رغم أن فيه منها كانت مهمة جدًا».

وفيما يخص الشللية في الوسط الفني، علقت قائلة: «أنا ظلمت نفسي أنا إنسانة اجتماعية قوي ونفس الوقت منعزلة بمعنى بيجي وقت أحب أقعد مع عيلتي وكان نفسي أخلف 4 ولا 6 أولاد زي عائلتي كلهم بيخفلوا كتير، رغم حبي لمهنتي ولكن العائلة والأسرة هي نمبر وان بالنسبة لي».

واختتمت لقاء سويدان قائلة: «وفي فترة الانتشار بنتي كانت محتاجه لي لأن معندهاش أم غيري والفن ممكن عدم وجودي غيري ألف هيعوض مكاني لكن أنا معنديش غير بنتي وبنتي مالهاش غيري ولو عمري جري دون الاستماع لبنتي في كل مراحلها هكون فشلت كـ أم وإنسانيًا».

لقاء سويدان