ماجد الكدواني: كنت عصبي وبكسر الحاجات.. واتعلمت إن التغيير يبدأ من نفسي

تحدث الفنان ماجد الكدواني عن التحولات الكبيرة اللي حصلت في شخصيته خلال السنوات الماضية، وعن إزاي قدر يغيّر من نفسه ويعيش حياة أكثر هدوء وسلام، بعد فترة كان فيها مليان غضب وضغط عصبي.

وقال الكدواني في تصريحات تلفزيونية: "زمان كنت شخصية تانية، كانت حياتي صاخبة جدًا، وكنت عصبي وسريع الغضب على أقل حاجة، وممكن أكسر حاجات حواليا، ده كان ضغط أعصاب وقلة خبرة في الحياة، لكن اللي غيرني إني شبعت من الشكل ده وقلت لنفسي تعالى نغير".

وأضاف: "لما أنا اتغيرت، اللي حواليا اتغيروا، وعرفت إن عدم راحتي كان مني، ولما غيرت نفسي ارتاحت واللي حواليا كمان ارتاحوا، ودي كانت نصيحة واحد قد أبويا".

وتابع الكدواني كلامه عن العائلة ودور الأب، قائلاً: "فكرة العيلة حلوة أوي، بحب أعيش في سلام ونناقش كل حاجة بهدوء، بس ساعات لازم الأب يكون حاسم، زي لما بنتي ساندرا كانت متعبة في مدرستها، قلتلها هتتنقلي يعني هتتنقلي، وكانت بتعيط علشان هتسيب أصحابها، لكن القرار طلع للخير، وفيه مواقف في الحياة لازم تكون حاسمة".