مدبولي: واجهنا فصولًا تضم 120 طالبًا.. وعودة الطلاب للمدارس بداية الإصلاح 

أكد الدكتور مصطفى مدبولي أن الدولة المصرية تواصل جهودها لتطوير منظومة التعليم وتحسين جودة العملية التعليمية، مشيرًا إلى أن الحكومة نجحت في خفض كثافات الفصول وتحقيق تحسن ملحوظ في مستوى حضور الطلاب واستيعابهم داخل المدارس.

وقال الدكتور مصطفى مدبولي خلال كلمته في مؤتمر "استشراف مستقبل مصر في التعليم": "دخلت بعض الفصول بداية توليتي هذا المنصب لقيت الكثافة كبيرة وفيه أكثر من 100 طالب في الفصل، كان فيه مناطق عندنا عدد الطلاب في الفصل الواحد 120 طالبًا في الفصل، ومهما كان جهد المعلم هيتعامل إزاي مع 120 طالبًا".

وأضاف: "النهارده والحمد لله ببقى حريص في كل زيارة ميدانية في كل محافظة أن لازم أزور المدرسة وأقعد وقت طويل هناك وأقعد أتكلم مع الأولاد وأسمع ليهم، وبصورة غير مباشرة أخلي الطلاب تقرأ من الكتاب، وأتعمد أزور مدرسة أو أدخل فصل مكنش محطوط في خط الزيارة عشان أتأكد أن الموضوع حقيقي".

وتابع: "النهارده فيه تحسن كبير جدًا في مستوى استيعاب الأولاد وتواجدهم في الفصول، والأهم أنا حاسس قد إيه بحماس المعلمين أن الطلاب رجعت المدرسة، والتواصل بين الطالب والمعلم".

وأوضح: "التقرير أكد أن الطفرة الحقيقية عودة الطلاب للمدارس، بس هل ده فقط اللي عايزينه؟ إحنا بنأكد إن دي البداية وهنرجع أولادنا للمستوى التعليمي اللي كلنا بنأمله، وده اللي معترفين بيه، إحنا لا نكابر ولا بنقول إحنا عندنا أحسن مستوى في التعليم، بالعكس، إحنا نعلم تمامًا التحدي، وده أول خطوات النجاح وهو إن تعترف باللي عندك".

وأكمل: "لا نكابر ونشتغل بأقصى جهدنا كلنا كمجموعة وإزاي نحسن كلنا من هذا الموضوع، وكل أملنا إن كل ولد يطلع من هذه البلد لو اتعلم صح هو ده الاستثمار الحقيقي الذي يؤدي إلى نجاح هذه الدولة".

واستطرد: "إحنا سمعنا أرقام رأس المال البشري وإن مصر رقمها 161 في التعليم، وحابب إن أطمنكم جميعًا، وحابب أقولك إحنا مش راضيين عن هذا الرقم بالرغم إن هو الأعلى في محيط المنطقة في ظروف زينا، وبالتالي طموحنا إن هذا الرقم يزيد في الفترة المقبلة".

واختتم: "كلنا لازم نعي ونفرح بالأرقام اللي طلعت في التقرير، لكن الأهم الاستمرار،  وأنا بوجه بيه وزير التربية والتعليم استمرار الأرقام دي وتحسنها، ولا يجب أن نركن إلى تقرير واحد طلع في مرحلة معينة، أنا اللي يهمني إن بعد سنة نلاقي الأرقام دي بتتحسن وفيه تطوير أكبر فيه كل المؤشرات الأخرى".