مسلم يرد على انتقادات بدلة الزفاف: بحب الفاشون.. وكفاية إنها عاجبة مراتي

خرج الفنان مسلم عن صمته ورد على موجة الانتقادات الواسعة اللي طالته بعد ظهوره ببدلة غير تقليدية في حفل زفافه، مؤكدًا إن اختياره للإطلالة كان نابع من ذوقه الشخصي وحبه للموضة.

وقال مسلم في لايف على حسابه الرسمي بـ"انستجرام": "اليوم كان حلو جدًا واتبسطنا بكل لحظة فيه، وبالنسبة للبدلة فأنا مش محتاج أعمل تريند أو أركب موجة.. أنا بحب الفاشون والقماش اللي جاي من فرنسا، واخترت حاجة بتعبر عن شخصيتي".

وأضاف: "اتعرضت لانتقادات كتير كأني أول واحد يلبس كده، مع إن فنانين كتير سبقوني، واللي مش عاجبه يعمللي أنفولو، لكن مش طبيعي الناس تقول كلام زي السم لمجرد إن حاجة مش على ذوقهم".

وأوضح الفنان الشاب إنه مش بيسعى يرضي الكل: "أنا بحب أطلع بشكل مميز، وده جزء من نجاحي.. خليتك تتكلم عن حاجة جامدة من وجهة نظري، وهي ثقافة مش بالضرورة تكون مصرية.. البدلة دي مش من المحيط، لكنها مختلفة ومميزة".

واختتم مسلم كلامه برسالة واضحة: "كفاية إنها عاجبة أهلي ومراتي.. وده أهم عندي من أي رأي تاني".