مسلم يعتذر لـ مصطفى كامل ونقابة الموسيقيين: غصب عني صعب عليا نفسي

وجه مطرب المهرجانات مسلم رسالة اعتذار لنقابة الموسيقيين والفنان مصطفى كامل نقيب الموسيقيين، بعد أزمته الصحية الأخيرة ووقفه عن العمل.

قال مسلم في فيديو نشره عبر خاصية الستوري التابعة لحسابه الرسمي بموقع انستجرام: «كل الناس اللي بتتابعني وبتحب مسلم، الفيديو ده بقدم فيه اعتذاري للنقابة كلها واعتذار مخصوص للنقيب مصطفى كامل، مش عايزك تزعل مني لو كنت دعيت عليك».

اعتذار مسلم لـ مصطفى كامل

وتابع: «ده بسبب أن أنا شاب لوحدي وغصب عني مقدرتش استحمل تعبي وصعب عليا نفسي لما ملقتش حد بيسأل عليا في عز تعبي بسبب إني اتوقفت عن الشغل.. وده أقل طموحي إني اشتغل زي زمايلي.. فزعلت إني قعدت وبيتي اتخرب وحياتي كلها وقعت النص بسبب عدم الشغل وفضلت كاتم جوايا».

واستكمل مسلم: «فأنا بعتذر للجنة العمل كلها وبخص أستاذ حلمي عبدالباقي وأستاذ أحمد أبو المجد وكل الناس الكويسة.. وأستاذ مصطفى كامل أنا بعتذرلك أنا زي ابنك وبتمنى تقبل اعتذاري حتى لو أنا مش هشتغل أبقى بس عملت اللي عليا واتأسفت لكم عشان ميكونش فيه حد زعلان مني».

أزمة مسلم ونقابة الموسيقيين

واختتم: «أنا والله ما شتمت حد كل اللي قولته حسبي الله ونعم الوكيل ودلوقتي أنتم أخواتي الكبار وأهلي وده بيتي والمفروض النقابة تجيب لي حقي ومبتجيش على حد وأستاذ مصطفى كامل من أول ما مسك النقابة وهو متطور في كل حاجة ومظلمش حد يارب ياخدني بصدر رحم وإن شاء الله أرجع شغلي قريب وده حلم صغير جدًا أتمنى يتحقق».