مصطفى حدوتة عن أغنية الألوان: كتبتها لبنتي وعمرو دياب من أجرأ النجوم

تحدث الشاعر مصطفى حدوتة عن كواليس تعاونه مع الفنان عمرو دياب، والنجاح الكبير الذي حققته أغنية الألوان في ألبوم صيف 2026.

قال مصطفى حدوتة في لقائه مع الإعلامية شيرين سليمان ببرنامج سبوت لايت، على قناة صدى البلد: «بقالي 4 سنين شغال مع عمرو دياب والسنة اللي فاتت عملنا أغاني كتير ونزلت أغنية واحدة أما السنة دي نزلت أكتر من أغنية».

وتابع: «كنت متراهن مع أخويا وحبيبي إيهاب عبدالواحد أن أول أغنية الناس هتتكلم عليها هي الألوان، والأغنية عملتها لبنتي خديجة بتليق عليها كل الألوان وأبوها فنان فعلًا، وعمرو دياب قوته في أنه جريء والنجوم اللي جراءة مميزين وأجرأ نجوم اشتغلت معاهم 3 عمرو دياب ومحمد رمضان وأحمد سعد».

واستكمل مصطفى حدوتة: «صعب أنك توصل لسهولة الكلمات وبتاخد مجهود».

ورد علي منتقديه قائلًا: «ليا حاقدين كتير في كل حتة هنا وفي هولندا وكل حتة لأني بشتغل وبنجح وبكبر، وكتير مستكترين أنك سنك صغير وبتعمل كل ده، وأكيد فيه ناس بتزق ناس وأنا أحترم اختلاف الأذواق لكن محترمش يشتموني أو يغلط في شخصي».

وأضاف: «وأكيد مش كل الأغاني اللي بعملها بخاطب بيها كل الناس وأغنية الألوان مش هيفهمها إلا الشباب الصغير، وأنا مؤخرًا بستهدف الجيل الجديد والناس اللي فاضية تسمع أغاني أنا مثلا مش فاضي أسمع لأني بصنع الأغاني».