ملك أحمد زاهر تكشف تفاصيل حالتها الصحية وتطلب من الجمهور الدعاء

كشفت الفنانة الشابة ملك أحمد زاهر عن مرورها بوعكة صحية غير مفهومة منذ ثلاثة أيام، مما أثر على حالتها النفسية بشكل كبير، وذلك من خلال رسالة نشرتها عبر خاصية 'الاستوري' على حسابها الرسمي بموقع 'إنستجرام'، حيث تحدثت بشفافية مع جمهورها عن الألم الجسدي والنفسي الذي تمر به، مؤكدة أن الحياة ليست دائمًا كما تبدو على مواقع التواصل.

وأوضحت ملك في بداية منشورها: 'طيب أنا عمري ما كنت بنزل غير الحاجات اللذيذة أو الهزار أو أي حاجة إيجابية من الآخر ولما كنت بحب أنزل حاجة سلبية كنت باخدها بهزار وبنزلها close friends وبهزر بيني وبين أصحابي.'

ثم انتقلت لتصف حالتها الصحية قائلة: 'بس بجد حاسه الفترة الأخيرة بيجيلي كومنتس كلها مانتى عايشة ومبسوطة واحنا مش عايشين وايه كل اللي انتوا فيه، وحاسه ان في ناس باصه على اتفه الحاجات اللي ممكن تكون عندي أو بتبسطني، زي مثلا إني أنزل اروح الجيم، أو أخرج مع أصحابي، أو يكون شكلي حلو وأنا رايحه إيفنت، حبيت بس أقول لكم إن الحياة مش وردي وأنا بقالي 3 أيام تعبانة شوية وعندي حاجة لحد دلوقتي مش فاهمة سببها، وجت فجأة وفي حوالي نص ساعة قبلها كنت زي الفل ومن ساعتها مش عارفة أنزل أو حد يشوفني باللي أنا فيه ده، ونفسيتي وحشة أوي.'

وأشارت إلى الهدف من مشاركتها لهذه التفاصيل مع جمهورها قائلة: 'أنا بحكي الكلام ده عشان تعرفوا بس إن حياتي فيها الحلو والوحش والله زي أي حد، بس أنا بحب دايمًا أشير الحلو بس، وغالبًا ده غلط فقررت أشارككم كمان الوحش، ومع إن اللي بيحصلي دلوقتي أنا بحمد ربنا عليه وعارفة إنه بإذن الله هيكون حاجة بسيطة وإن شاء الله هاخف وكله هيكون تمام، بس هو مخلي نفسيتي وحشة أوي.'

وفي ختام حديثها، طالبت الجمهور بعدم التسرع في الحكم على حياة الأشخاص من خلال السوشيال ميديا: 'حقيقي كل اللي طالباه إنكم ماتحكموش على حد من السوشيال ميديا أو من ظهوره في أي حاجة لأنها بتوري بس يمكن 20% من حياته، وادعولي أخف بسرعة وشكرًا.'

وطمأنت جمهورها في نهاية الرسالة بقولها: 'والهدف من الاستوري ده مش إن أي حد يقلق لأن الحمد لله أنا كويسة وإن شاء الله اللي عنده ده ليه حل وأنا تمام مافيش حاجة مقلقة، أنا بس حسيت إني محتاجة أشارك الوحش زي ما بشارك الحلو مش أكتر.'

أعمالها الأخيرة

يُذكر أن ملك أحمد زاهر قد شاركت في الموسم الرمضاني 2025 بمسلسل 'سيد الناس'، وهو من بطولة عمرو سعد، وخالد الصاوي، وإلهام شاهين، وأحمد زاهر، وأحمد رزق، وبشرى، ومنة فضالي، وأحمد فهيم، ورنا رئيس، ونشوى مصطفى، ومن تأليف وإخراج محمد سامي