ميار الببلاوي: دعيت على إيناس الدغيدي في الحرم وتعرضت لتهديدات بسبب وفاء مكي

أثارت الفنانة ميار الببلاوي ضجة واسعة وجدلًا كبيرًا بسبب كشفها العديد من الأسرار من مسيرتها الفنية، بجانب حقيقة كتمان شهادتها وبراءة الفنانة وفاء مكي.

قالت ميار الببلاوي عن كواليس فيلم ديسكو ديسكو، عبر تصريحات تلفزيونية: «كنت 19 سنة صغيرة ومش محجبة ومكنتش مصدقة نفسي إني همثل قدام نجلاء فتحي وصلاح ذو الفقار وكنت مطيعة جدًا وحابة الموضوع ودخلت علشان أعمل مشهد وطلبت أعمله بعد الفطار لكن اتقال لأ».

ميار الببلاوي ونجلاء فتحي

وتابعت: «كنت بصور في الديسكو أسبوعين كنت أنا وأختي الوحيدين اللي صايمين من بين الفنانين الشباب، وصورنا طول النهار في الديسكو، مكنش ينفع صيام لأن كل المشاهد كان فيها شرب، وفي يوم المشهد المثير للجدل دخلت الحمام وقفلت عليّ وإيناس الدغيدي اتعصبت علشان مكنش ينفع أقعدهم ساعتين لحد الفطار علشان أعمل مشهدي».

واستكملت ميار الببلاوي حديثها: «كنت بعيط علشان مفطرش وأضيع وقت وكان يجب أن يقنعني أحد بأن أفطر، وهنا جاء دور نجلاء فتحي، كانت إنسانة رائعة ولو قالت لي إرمي نفسك في النار هرمي، وجات قالت لي يلا يا حبيبتي عشان تعملي المشهد، وأقنعتني بأن رمضان مش بناكل فيه عشان نبقى زي الفقراء وافطري متخافيش الموضوع هيعدي».

ميار الببلاوي

ميار الببلاوي وإيناس الدغيدي

وأشارت إلى أنها دعت على المخرجة إيناس الدغيدي في الحرم المكي بسبب فيلم ديسكو، معلقة: «مكنتش عاوزة أعمل كل المشاهد دي في فيلم ديسكو، ولا كنت عاوزة ألبس مايوه ومش عايزة حد يجيب سيرة المشاهد دي، المشهد ده ميصحش ولا يليق برمضان».

واختتمت ميار الببلاوي حديثها عن موقفها من إيناس الدغيدي: «مكنتش عاوزة مشهد عمرو عبد الجليل ولا مشهد شريف منير، والحاجات دي كلها عملت لي مشاكل، وأنا الحمد لله اتحجبت فمش عايزة حاجة زي كده تتعرض وإيناس الدغيدي خلتني أعمل مشاهد ساخنة في فيلم ديسكو في نهار رمضان».

الفنانة ميار الببلاوي

ميار الببلاوي ووفاء مكي

وكشفت أيضًا تفاصيل تورط الفنانة وفاء مكي في تعذيب الخادمتين، وأوضحت أنها لم تكتم الشهادة ووفاء ليست بريئة، معلقة: «القضية إن في واحدة جابت لي شغالات وكنت نازلة بسرعة رايحة فرح بنت خالتي، وكنت محتاجة لهم علشان ابني كان رضيع والدادة بتاعته مشيت، ولقيت واحدة منهم ميتانة على نفسها زي ما تكون نعسانة والتانية واقفة متضايقة، طلبت إني آخد واحدة بس».

وتابعت ميار الببلاوي: «فاشترطت الست عليّ إنهم يكونوا مع بعض، والتانية هرشت في شعرها عشان توريلي إن شعرها محروق وسألت الست قالت إن وفاء مكي قالت إن البنت عندها قراع وحلقت لها شعرها.. وقولتلها عندها قراع وجايباها لابني أنا مش عايزاهم».

واستكملت: «لم أكتم الشهادة لمدة 23 سنة، مكتمتش حاجة خالص، في فرق بين إني أكتم وإني أكون مش فاهمة ومنذ 23 سنة لم أكن كبيرة بشكل كافي، ومكنش في ايدي أي حاجة، ولا كنت ملك نفسي ولا كنت موجودة في مصر ولا كنت أقدر أوصلها وكان في تضارب في الأقوال مكنتش فاهماها، وساعتها كنت فاهمة غلط إنها بريئة والشهادة ملهاش أي علاقة بالبراءة».

واختتمت: «أنا معيطتش مع هند عاكف، لكن وفاء مكي قالت إنها مش لاقية تأكل ابنها وبتستغيث علشان مش لاقية تاكل، فقلت يا جماعة سيبوها في حالها ولم أخاف من رسالة التهديد لإخفاء شهادتي، جوزي هو اللي بعتها، كانت لعبة علشان مكنش عايزني أروح أفتح علينا فتحات، وبعد ما رجعنا من سوريا قالي بطلي عبط أنا اللي مهددك، وسألت المحامي بتاعي علشان أروح أشهد قالوا لي كلامك لا هيقدم ولا هيأخر».

ميار الببلاوي