نادية الجندي: محبة الجمهور هي الطاقة اللي بتسعدني

شاركت النجمة نادية الجندي جمهورها بمجموعة صور جديدة من إحدى المناسبات الخاصة، وعبّرت من خلالها عن سعادتها الكبيرة بالمحبة اللي بتتلقاها من الناس في كل مكان.

وكتبت نادية الجندي عبر 'فيسبوك': 'سعيدة بمحبة الناس ليا في كل مكان، واشتياقهم ليا في أعمال جديدة، دي الطاقة الإيجابية اللي بتسعدني في الحياة.. بحبكم أوي'.

ظهور نادية الجندي دايمًا بيكون محط اهتمام، خصوصًا مع اشتياق جمهورها الدائم لرجوعها للشاشة، وده اللي خلى كلامها عن الغياب ياخد اهتمام كبير، الفنانة أوضحت في تصريحات سابقة إن السبب الحقيقي لابتعادها عن الساحة الفنية هو إن الأعمال اللي بتتعرض عليها دون المستوى، ومش بتتناسب مع تاريخها الكبير، وقالت: 'أنا مش كسلانة، لكن اللي بيتعرض عليا مش مناسب، والإمكانيات مش هي'.

وأكدت نادية إنها دايمًا حريصة على اختيار عمل يليق بجمهورها وتاريخها، وأضافت: 'أنا خلية نحل، مبقدرش أقعد من غير شغل، بس محتاجة أرجع بعمل قوي يحمسني، خصوصًا إن مستوى أعمالي دايمًا كان فيه إبهار، والتطور في التكنولوجيا دلوقتي ممكن يخليني أقدم المواضيع اللي بحبها بشكل مبهر، فيه رسالة وإبداع'.