نجوى فؤاد تكشف أسرارا لأول مرة: والدي حاول التخلص مني وعمري 12 عاما

كشفت الفنانة نجوى فؤاد أسرار من طفولتها وحياتها الشخصية لأول مرة، ومنها محاولة والدها التخلص منها.

قالت نجوى فؤاد عبر تصريحات تلفزيونية: «نشأت في بيئة متدينة بالإسكندرية ولكن غير متشددة وأبي كان مهندسًا كبيرًا في الملاحة، وأبويا مكنش بيحب البنات ويميل للذكور، ولما اتجوز واحدة بعد وفاة أمي وأنا عندي 12 سنة طلعت عاقر قالت له سيب ليا الطفلة دي أربيها وأنا هاجوزك من عيلتنا وفعلا اتجوز بنت خالتها وأنجب منها ولدين».

طفولة نجوى فؤاد

وتابعت: «أبويا بعد أما اتجوز وخلف ولدين تخلى عني خالص وتركني، وقبلها كان عايز يجوزي وأنا عندي 12 سنة فرفضت لرغبته في التخلص مني، وأنا أول شخص اتجوزته كان أحمد فؤاد حسن وكان عمري وقتها 16 سنة بمستخرج رسمي، واتجوزته لأني مكنش عندي أي أهل في القاهرة، بعد ما تركت الإسكندرية، وأنا في الأساس أمي فلسطينية وأبويا مصري».

كما كشفت نجوى فؤاد حقيقة زواج الفنان الراحل عبد الحليم حافظ والراحلة سعاد حسني، قائلة: «رقصي مع العندليب عبد الحليم حافظ في أغنية قولوله الحقيقة كانت بوابة النجاح رغم إني كنت كومبارس، عمري وقتها كان 16 سنة».

نجوى فؤاد

حقيقة زواج عبد الحليم حافظ وسعاد حسني

واستكملت: «عبد الحليم حافظ كان شخص جميل وأخلاقه جميلة وإنسان متواضع، وكل يوم عند أصحابه بيقعد على الأرض ويمسك الدف ويغني، وحبيت عبد الحليم حافظ كإنسان وفنان وعجبني أسلوبه مش كحبيب لأنه كان بيحب سعاد حسني أيامها وهي كانت صديقتي، وعبد الحليم متجوزش سعاد حسني واللي يقول إنه اتجوزها غلطان وأختها اللي قالت إنه اتجوزها غلطانة».

واختتمت نجوى فؤاد: «هو كان بيحبها بس متجوزهاش لأن صحته متسمحلوش إنه يتجوز بدون تفسير لأن مينفعش أطلع سر إنساني زي ده»، لافتة إلى أنها ذهبت معه عدة مرات للأطباء ورافته في مرضه.