نصائح أحمد أمين لجمهوره قبل انتهاء عام 2020

وجه الفنان أحمد أمين لجمهور نصائح استفاد منها خلال عام 2020.

وكتب «أمين» عبر حسابه الشخصي « فيس بوك»، « اتعلمت من ٢٠٢٠ .. فيه دروس بتكون بديهية جدا ومليون شخص نصحك بيها.. بس لما بتتحط في موقف مؤثر في حياتك بتتعلم الدرس ده بطريقة أوضح وأقوى.. فأنا قررت في ٢٠٢٠ إن كل ما اتعلم حاجة من موقف اكتبها.. فيه حاجات ما فهمتهاش لغاية دلوقتي وفيه حاجات كتبتها بعد فترة».

وأضاف، «بصراحة مش كل الدروس عملت بيها المهم حاولت ألخصها فمن الآخر كده أنا اتعلمت في ٢٠٢٠ الآتي، إن الأحلام اللي بترسمها لو انت مصدق فيها يبقى هاتتحقق.. حتى لو كانت وقت ما بترسمها تبدو هبل أو خيال.. إن الواحد مش هايستفيد أي حاجة لما يبقى مهموم بالشغل لدرجة الحزن أو الاكتئاب بدعوى إني شخص مسؤول وبحب شغلي.. بالعكس.. لو بتحب شغلك خليك بشوش واستقبل كل تفصيلة في المشروع بإيجابية وعامل كل الأطراف على اننا في مركب واحدة.. وده نتيجته طلعت مبهرة».

وتابع، «إن الواحد مش مسؤول عن نتايج الشغل.. يعني النجاح والفشل فعلا مش بإيدينا.. اللي بإيدينا الاجتهاد والمحاولة.. وده برضه مريح نفسيا إن بعد كل تجربة تراجع نفسك.. عملت اللي عليك.. لو أيوة يبقى كمل في اللي بعده وطنش النتايج.. إن الكرم.. وحب الخير للآخرين .. بيعمل لك مكانة خاصة عند الناس وبيصنع لك غلاف حماية من المشاكل ما تعرفش جاي منين.. حاجة إلهية كده ».

واستطرد حديثه، « إن أي فريق لو فيه شخص واحد بيصدر طاقة سلبية يبقى لازم يمشي من الفريق حتى لو كان هو أشطر واحد وهداف الفريق وعبقري زمانه.. الشغل مع ناس ايجابيين وبشوشين هايطلع نتايج من الفريق كله أعظم بكتير من جو الشكوى والبكا أو الإحباط والسلبية.. إن الواحد لو اختار فريق كويس يشتغل معاه ببساطة هايركز في شغله أكتر فهايظهر في أحسن حالاته بمجهود طبيعي منغير حرق عالمكنة ».

وتابع، « أن الترفع عن المطالبة بصغائر المكاسب يفتح لك أبوابا من الخير لم تكن تحلم أن تطلبها.. وأن التواصل والتوثيق الكتابي في أدق التفاصيل يقلل من كم ونوعية المشاكل التي تواجه أي مشروع .. وأن مراجعة النيات والمقاصد والأهداف قبل أي قرار أو خطوة يهون عليك مرارة الندم.. وبالبلدي بينور لك طريقك»

وأنهي حديثه، «أن الانصياع عاطفيا وراء شكاوى الناس يصيبك بالغم والبطالة.. الناس تعشق الشكوى.. وعليك أن تظهر لهم دوما أنك منشغلا بحالك.. اهرب بلباقة.. ولا تترك نفسك فريسة لأمراضهم.. إن التطور مش انك تموت نفسك ولا تتفرم في العمل الشاق.. التطور ببساطة هو الاستمرار رغم الفشل.. إنك تقدر ترجع، و كتابة المذكرات يوميا أحد وسائل الاتزان النفسي.. واختراع عبقري هاتكلم عنه كتير بعدين لأنه كان من أسباب تغير حياتي فعلا».

أحمد أمين بطلا لحملة توعية الطلاب وأولياء الأمور قبل عودة المدارس

أحمد أمين بطلا لحملة توعية الطلاب وأولياء الأمور قبل عودة المدارس