نقيب صيادلة القاهرة عن مينا: كان علامة دفعته.. وفخورين بيه.. فيديو

كشف الدكتور محمد الشيخ، نقيب صيادلة القاهرة، تفاصيل دعمه للدكتور مينا الصيدلي، الذي تصدر مواقع التواصل الاجتماعي خلال الفترة الماضية بعد ظهوره أثناء عمله في توصيل الطلبات، مؤكدا أن ما قام به دور النقابة في مساندة الصيادلة والوقوف بجانبهم.

وقال خلال مداخلة هاتفية مع الإعلامية نهال طايل في برنامج تفاصيل المذاع على قناة صدى البلد2: «الراجل ده محترم وخلوق، وده دورنا وإحنا كلنا نساعد بعض، ومصر تستاهل مننا كتير وتستاهل مننا كل خير، والراجل ده راجل لا طلع تمرد ولا سب ولا شتم ولا قال أي حاجة ولا اشتكى لأي حد ولا دخل في صراعات».

وأضاف: «كانوا بيقولوا عليه علام الدفعة بتاعته، فالراجل متفوق جدا، وراح اتصرف وخد الأوبتيكال بورد، وبقى يروح يحضر محاضرات في كلية الطب مع الدكاترة اللي في كلية الطب ويحضر سمنار معاهم، بيمارس حاجة بيحبها جدا اللي هي وبيحب المهنة بشكل كبير جدًا».

وتابع: «جيه في 2017 حصل عنده ظروف أسرته لسبب ما ، وبعدين الصيدلية اتخذت منه، ما قعدش يعيط ويقول إشمعنا أنا،  الراجل خد المبادرة واشتغل في أكتر من مجال لحد ما يلاقي المكان اللي هو بيشوف فيه نفسه».

وأوضح: «إحنا كلنا فخورين بيه، أنا النهاردة توجهت لشركات كتير، شركات أدوية، والحقيقة في تواصل معايا 5 شركات أدوية، وكلهم عرضوا إنه ييجي بكرة ويشتغل في أي شغل من بكرة وبمرتبات رائعة ومجزية جدا».

واستكمل: «الراجل قال لا أنا مش عاوز أشتغل في شركات أدوية ولا أقعد في أي مكان بين 4 حيطان، أنا روحي زي السمك كده، كان بيقول كده بالظبط، لو طلعت برا المية أموت زي السمك كده».

وأضاف: «كنت مجهزهوله شركة رعاية طبية، الشركة دي بتهتم وتعمل شغل في البيت، اللي موجود في المستشفى بيتعمل في البيت، طبيب بيكشف ويشخص ويدي العلاج، وهو يتابع حالة المريض بعد كده في البيت».

واستطرد: «انبسط جدا وزملاؤه كلهم النهاردة كانوا محاوطينه بكل الحب والحنان، وكلنا داعمين ليه، وقلنا له العقد قدامك عشان بردو هو كان متخوف من أي حاجة، قلنا له إحنا في ضهرك، شوف بنود العقد واقعد افهم طبيعة الشغل، وبعد كده توقيع العقد هيتم في النقابة».