«هتتسببي في حبس أخوكي ظلم».. شقيق شيرين عبد الوهاب يخرج عن صمته ويوجه لها رسالة

خرج محمد عبد الوهاب شقيق الفنانة شيرين عبد الوهاب، مدافعًا عن نفسه بعد تصريحات شقيقته الأخيرة والتي أكدت خلالها على أنه «غدر بها وباعها»- على حد وصفها، إلى أحد الأشخاص أعطى له الحق في إدارة صفحاتها على السوشيال ميديا، بموجب توكيل عام.

ونشر محمد عبد الوهاب، عبر صفحته الشخصية، شهادة حفظ القضية في التهم المنسوبة إليه، قائلاً: « كل واحد عنده قدرة على تحمل الأذى لكن للقدرة دي حدود.. ده قرار النيابة العامة بالحفظ إدارياً في كل الاتهامات اللي اتوجهت ليا بتاريخ ۱۹/۱۲/۲۰۲۲ يعني من سنتين».

وتسائل محمد عبد الوهاب، قائلاً: «إيه هي بقي الاتهامات دي؟ كسر الضلع والعشرين راجل اللي دخلت بيهم على اختي! وطبعا موضوع السكينة! واتسألت علي التوكيل بتاعي وبتاع امي من وكيل النيابة المحترم وكله مثبت، س سوال ج جواب. التوكيل اللي بتقول ان انا أسأت استخدامه».

وأضاف شقيق شيرين عبد الوهاب قائلاً: «وده إن دل على شيء فهو يدل على إني مش عايز أختي شكلها يبقي وحش قدام الناس وقدام جمهورها والأهم  أمي اللي كنت   مفهمها ان بنتها اتنازلت وانا  أستحمل أي حاجة إلا إنها تتوجع في ولادها».

وتابع محمد عبد الوهاب، قائلاً: «وبناء عليه رضيت بالظلم لوحدي لكن الحقيقة غير كده، انا اتطلبت في النيابة واتسألت رسمي وتم اخلاء سبيلي من النيابة علي ذمة القضية لحد مااتحفظت القضية بس انتي بقي بشطارتك وبأهل الشر اللي حواليكي اللي خسروكي نفسك وأهلك، خليتيني انهارده أطلع أقول جزء من الحقيقة للناس رغم إن ده آخر حل كنت أحب ألجأ ليه. وده حق ربنا لا ظلم ولا افترى».

وأشار محمد عبد الوهاب قائلاً: «نفس الكلام اللي من سنتين بيتعاد تاني معرفش لمصلحة مين مع اني بعيد عنك وعن حياتك من سنين قبل الواقعة و سنتين من بعدها».  وأضاف شقيق شيرين عبد الوهاب، «ده قرار النيابة العامة الموقرة في الافتراءات اللي اتوجهتلي ، مش بيان من محامي.. وأي حاجه هرد بيها هتكون مستند حكومي عليه ختم النسر».

وفي الختام نوه محمد عبد الوهاب قائلاً: «مرفق هنا الفيديو بتاريخ ١١/١١/٢٠٢٢ اللي قولتي فيه انك اتنازلتي ولعبتي دور الضحية، ومرفق برضو المستندات الرسمية اللي بتثبت ان القضية فضلت شغالة  وكنتي هتتسببي في حبس أخوكي ظلم وهو لحد آخر لحظة بيحاول يحميكي ويحمي أمك  ويحمي بناتك».

تصريحات شيرين عبد الوهاب

حسمت الفنانة شيرين عبد الوهاب، الجدل المثار مؤخرًا بين شقيقها محمد عبد الوهاب، مع طليقها الفنان حسام حبيب، بعد تسريب تسجيلات صوتيه له يؤكد من خلالها أن الأزمات التي تعرضت لها مؤخرًا وابعدتها عن الساحة الفنية وعن جمهورها بسبب شقيقها، مؤكدة على أن كلام «حسام حبيب»، هو الحقيقة، وأن شقيقها باعها لإحدى الشركات، على حد وصفها.

وأوضحت شيرين عبد الوهاب، خلال تسجيل صوتي، قائلة: «مساء الخير على جمهوري الحبيب أنا فوجئت باللي بيحصل على السوشيال ميديا بين محمد عبد الوهاب وبين حسام حبيب، فأنا حبيت آكد أن كلام حسام مظبوط جدًا وأني أخويا فعلاً باعني، والتصريح اللي نازل ده نزل من محامي محمد شامي المستولي على السوشيال ميديا بتاعتي، وبتوكيل أنا كنت عاملاه له قديم، مضاله عقد بتخليه يحصل على السوشيال ميديا بتاعتي، وموقعين بتاريخ قديم، وفعلاً كل اللي قاله حسام حبيب مظبوط».

وأضافت شيرين عبد الوهاب، قائلة: «انا مبحبش دلوقتي اتكلم عن مشاكلي الشخصية عشان ما اشغلش حد والناس ماتفضلش تقول احنا ماورناش غير شيرين ومشاكل شيرين، بس لازم تفهموا أن في أغاني حلوة جدًا جدًا بالتعاون مع توما وعزيز الشافعي ومدين، وفي حاجات بتخلص عشان التصريحات والأوراق، عشان المشاكل اللي مع الشركة المنتجة اللي تخصني واللي فيها حد بشخصه قاصد يقعدني في البيت، احنا بنخلص الحاجات دي والأغاني هتنزل وهتعجبكم جدًا جدًا».

وأوضحت شيرين خلال التسجيل الصوتي قائلة: «عايزاكم ماتصدقوش أي حاجة من اللي محمد عبد الوهاب بيقولها، وبإذن الله الأغاني لما تنزل تعجبكم بس مشكور أن هو بيرد بالنيابة عن أهلي وهو اللي بيقول الحقيقة مش أهلي، برغم أن المحكمة حكمت في القضاء المصري، أن عقدي انتهى مع روتانا هم لسة رافعين قضايا عليا وموقفين الدنيا كلها بس أنا واثقة في نزاهة قضاء بلدي».

واعتذرت شيرين عبد الوهاب لجمهورها قائلة: «وأنا أسفة أني بشغلكم بأخباري، بس كان لازم أرد عشان صحيت من النوم لاقيت السوشيال ميديا مقلوبة، وأنا ماليش دخل في اللي بيحص ده، والله صدقوني أنا مش عايزة أضايقكم بأي أخبار عني سواء حلوة أو وحشة، عشان عارفة أن كل واحد فيكم أكيد عنده هموم وعنده مشاكل، مفيش في الدنيا غير شيرين، ده اللي بيتقال كل شوية شيرين شيرين».

وأشارت شيرين عبد الوهاب، قائلة: «صدقوني الفترة اللي فاتت كنت ساكتة ومبتكلمش في تصريحات ولا أي حاجة وعمومًا أنتم أهلي وفعلاً أثبتولي أنكم أهلي وبتردوا غبتي وبعد أذنكم في بيان رسمي هينزل من مكتبي مكتب الاستاذ ياسر قنطوش هيكون فيه كلام أوضح ويا ريت ماتصدقوش غير البيانات اللي بتنزل من مكتب الأستاذ ياسر قنطوش دي بتبقى تصريح مني شخصيًا، غير كدة دي شائعات وأكاذيب ماتصدقوهاش، وأنتم طبعًا عارفين مين اللي بيقول الحقيقة هو مش أهلي، وأنا بشكركم ا حبايبي ربنا يخليكم ليا وماتحرمنش منكم بحبكم قد الدنيا».