هلا رشدي: الغضروف انفجر.. والعملية كانت صعبة «وفتحت صفحة جديدة مع نفسى»

كشفت الفنانة هلا رشدي، تفاصيل العملية الجراحية التي أجرتها مؤخرًا، قائلة: «الحكايه باختصار هُمَّه كانوا ١٣ يوم من أصعب أيام حياتي من غير نوم وبـ أنين بيقطع في قلبي وجسمي».

وتابعت عبر حسابها الرسمي على موقع التواصل الاجتماعي فيسبوك: ومفيش على لساني غير كلمة يا رب بكل اشكالها من قرآن وذكر بسبب آلام مزمنه متواصله زي النار القايده في ظهري و رجلي الشمال اللي فشلت كل المسكنات في تسكينها، ده انا ضربت تيمو يا أخي.

وأوضحت: الأدهى والأمَر إني كنت بره مصر ومش عارفه أرجع لأسباب لها علاقه بالإجراءات.. وما صبَّرنيش فيهم إلَّا وَنَسي بالله والسكينه اللي ملأ بيها قلبي وهوه بيطمني بكلمتين واسى بيها روحي 'فَصَبرٌ جميل.

وواصلت حديثها: رجعت مصر واكتشفنا في الرنين المغناطيسي إن في غضروف انفجر ونزل على عصب رجلي الشمال .. كانت عمليه طويله وصعبه لكن بفضل الله ثم بدعواتكم تمت العمليه بنجاح الحمد لله وفتحت صفحه جديده مع نفسي وروحي وكانت من أجمل المكافآت.

واستكملت: ونوَّر بصيرتي و شوفت كل حاجه على حقيقتها واكتشفت قد ايه الانسان ضعيف وان الدنيا في لحظه تخلص على اهون سبب فمش مستاهله الدوشه والتفاصيل ديه كلها .

وأكملت كلامها: «أنا رجعت البيت الحمد لله ومن النهارده بدأت رحلة العلاج بالمكوث شهر في المنزل مستلقية على ظهري عشان كل حاجه ترجع لنصابها الطبيعي ان شاء الله.. أرجوكم أحمدوا الله على نعمة الصحه وادعوا يديم عليكم الستر و الصحه و العافيه.. لا أراكم الله مكروه فيكم ولا في ذويكم».

وأردفت «شكراً لكل الحبايب اللي ربنا طبطب عليا بيهم الفتره اللي فاتت»، مضيفة  «من يوم العمليه اللي كان عامل زي الزفة في المستشفى وأنا بابتسامتي المُعتاده بقاوم الألم وأنا في قمة السعاده والرضا».

واختتمت: «وبعدها عطايا ربانية وليالي ملاح مليئة بالحب والدعم النفسي والمعنوي والمورفين، من كل قلبي بحبكم وزادت غلاوتكم في قلبي وعرفت قيمتي عندكم».

مابين المرض والاعتزال .. شائعات واجهت الفنانة عبلة كامل خلال الفترة الأخيرة

أول قرار ضد الفنانة غادة إبراهيم بعد خناقة إلهام شاهين