هنا الزاهد: افتقدت مشاعر الأب ومعرفش يعني إيه أب

تحدثت النجمة هنا الزاهد عن تأثرها بافتقادها وجود الأب بحياتها، رغم أن والدها كان متواجدًا في حفل زفافها على النجم أحمد فهمي.

هنا الزاهد ومشاعره الأبوة

وقالت هنا الزاهد في تصريحات تلفزيونية: 'ناس كتير فاكرة إن بابا مش موجود، هو موجود وكان في فرحي، بس هو مش قريب، وسبب من أسباب خوفي من إني أغلط إني كنت خايفة لو جالي استدعاء ولي أمر ماما تيجي وأنا عايزة بابا ييجي'.

واستكملت هنا الزاهد حديثها، وقالت: 'لما كنت في فرح بنت صلاح عبد الله شوفت أب بيعيط بحرقة على بنته ومبسوط بيها، ووقفت على جنب أعيط، وكان إحساس عمري ما حسيته ونفسي أحسه'.

وتابعت هنا الزاهد كلامها، وقالت: 'بابا إنسان كويس جدا، وعنده أسرة ثانية ربنا يخليهم له ويخليه ليا، لكن افتقدت أوي مشاعر الأب ومعرفش يعني إيه أب، والله يرحمه طلعت زكريا ملا الحتة دي لكن مش 100%'

تصريحات هنا الزاهد

وتابعت: 'طلعت زكريا كان مثلا يقعد مع بنته أميمة وتقعد على حجره، وطبعا هي بنته ونور عينيه، لكن كنت أبص عليهم وأغير وأقول يا بختها، هو طبعا كان نعم الراجل وعاش مع ماما كتير وإنسان مفيش زيه'.

وأختتمت هنا الزاهد كلامها، وقالت: 'علشان كده معرفش أحب حد في سني، بحس إنهم إخواتي وأنا عايزة حد يحتويني ويبقى ضهر وسند وأبقى حاسة بالأمان، وكان نفسي لما أحب أروح لبابا أقول له، هو هيبقى فاهم أكتر مني'.