وائل رياض: وفاة محمد عبد الوهاب أصعب لحظة مرت عليا في حياتي الكروية

استعاد وائل رياض، المدرب المساعد في منتخب مصر الأولمبي ولاعب الأهلي السابق، ذكريات واقعة وفاة محمد عبد الوهاب، ظهير الأهلي السابق.

قال وائل رياض عبر صفحته الشخصية على موقع التواصل الاجتماعي 'فيسبوك':' كنا سهرانين مع بعض بنحضر أغنية إعتزال سيد عبد الحفيظ ، قالي بات معايا النهاردة ونروح سوا التمرين الصبح قولتله يا بوبا اشوفك بكرة يا صاحبي وروحت البيت'.

أضاف وائل رياض:' تاني يوم كنا في التمرين الساعة ٩ الصبح في التتش، عملنا التسخين وبدأنا التقسيمة ومرة واحدة وقع في الملعب، صراخ وزعيق هاتوا الاسعاف اطلبوا الاسعاف'.

أوضح وائل رياض:' عربيتي كانت راكنة أمام الملعب، طلعت جري وشيلناه ودخلناه العربية وركب جنبي كابتن حسام البدري و ورا على الكنبة عبد الوهاب، ودكتور ايهاب علي اللي بيزعق وبيقوله فوق يا عبد الوهاب'.

أتم وائل رياض:' وصلنا المستشفي وبعد شوية بلغونا بالخبر مات عبد الوهاب، اصعب لحظة مرت عليا في حياتي الكروية ، ٣١-٨-٢٠٠٦ ، في الجنة ونعيمها يا عبد الوهاب وعمرنا مهننساك'.