والدة أيسل تروي تفاصيل صادمة: حق بنتي مش هيضيع.. والشرطة والنيابة مقصروش

روت والدة الطفلة أيسل في برنامج تفاصيل الذي تقدمه الإعلامية نهال طايل على قناة صدى البلد، تفاصيل اللحظات الأخيرة في حياة ابنتها، مؤكدة أن الجاني كان داخل شاليه مجاور لهم وأنه راقب الطفلة قبل ارتكاب جريمته.

وقالت الأم باكية: "أيسل ماتت في ثانية.. زي لما تقفلي باب أوضة.. أنا مسجلة كل حاجة على موبايلي، والنيابة لما شافوا الفيديو عرفوا إن اللي حصل كله من 30 ثانية لدقيقة. الولد نفسه اعترف إنه كتم نفسها وقال لهم إنها خبطت خبطة واحدة برجليها.. دي كانت طلوع الروح."

وأوضحت أنها لم تشك في البداية أن ابنتها تعرضت لاعتداء: "جبتها وغيّرت لها لبسها، وجي دكتور قال لي هي خلاص ميتة. مفيش نقطة ميه خرجت من بقها ولا مناخيرها، والشرطة والنيابة كانوا بيقولوا مستحيل دي غرق.. اللي بيغرق بيقعد ربع ساعة، هما اللي كشفوا الحقيقة، نفسي أشكر كل واحد فيهم، لو مش هم كان حق بنتي ضاع."

وكشفت الأم أن الجاني كان متواجداً مع والدته: "هو كان في شاليه جنبنا بالضبط هو ومامته. أيوه كانت موجودة أثناء الحادث، كانت واقفة وهو بينفذ فعلته. الولد ده مش أول مرة.. وربنا ما بيفضحش حد من أول مرة."

وأشارت إلى أن أسرة الجاني تعيش خلافات: "مامته وباباه منفصلين تقريباً.. الولد اعترف بده في التحقيقات."

وأكدت أنها تثق في العدالة رغم ألم الفقد: "القاضي قال لي لو في أكتر من الإعدام كنت هديه له.. وأنا راضية بقضاء ربنا، بس مش مسامحة.. لا هو ولا أهله ليوم الدين."

وقالت إن والد الطفلة ما زال يعيش الصدمة: "باباها أربع أيام بينزل لها المقابر. إحنا حياتنا وقفت عند اليوم ده."