20 صورة من مشاركة الرئيس السيسي أبناء وأسر الشهداء احتفال عيد الفطر

شهد الرئيس عبد الفتاح السيسي، احتفالية عيد الفطر المبارك مع أبناء الشهداء من القوات المسلحة والشرطة والفرق الطبية.

وقال الرئيس «أهلا وسهلا، سعداء بيكم، عيد سعيد بيكم، كل سنة وأنتم طيبين، والله متشرفين بيكم»

ووجه الرئيس عبد الفتاح السيسي، التحية إلى أبطال مسلسلي الاختيار 3 والعائدون خلال احتفالية أبناء الشهداء.

وقال الرئيس السيسي «مش هتمشوا، فرصة إني أقولكم كل سنة وأنتو طيبين ونشكركم، اللي أنتو عملتوه، كان جزء كبير منه لصالح الأبطال والشهداء اللي ضحوا عشان خاطر مصر تعيش، قولنا إن منسيبش التاريخ لحد، والله والله والله كنا حريصين على عدم حدوث تصادم، والله اللي أنتو عملتوه وسجلتوه للناس هو الحقيقة».

رسالة السيسي لأبطال الاختيار

وتابع «بقول هنا لكل ولاد مصر وأسر الشهداء والمصابين، أوعوا تفتكتروا أن أبناءكم وأزواجكم سقطوا في معركة طغيان، إحنا لم نعتد، حاولنا وكل كلمة اتقالت كانت عبارة عن واقع اتنقل للناس كلها، عشان الولاد الصغيرة لما تكبر تقول إحنا أبناء الشهداء والأبطال اللي حافظوا على البلد دي، فمحدش  يزيف تاريخهم، ويضيع قيمة اللي هما عملوه».

ووجه رسالته لأبطال المسلسلين «شوفتوا قد إيه عمل درامي بألف كتاب، وألف ساعة، أنتو متعرفوش أنتو عملتوا إيه، تصدقوا بالله حتى البيان اللي كاتبناه كنا حريصين فيه على عدم حدوث صدام، لا قولنا فيه عزل رئيس ولا جماعة إرهابية ولا أي حاجة، حاولنا كتير نحل المسألة من غير مواجهة أو صراع، لكن للأسف الادعاء والشائعات، ومحدش عايز يفكر اللي اتقال ده كان حقيقة ولا حتى نص حقيقة».

وأضاف «ربنا يكفينا أهل الشر، بقول للمصريين خلوا بالكم من بلدكم، محدش كان هيقبل أن في حاجة زي الاختيار تتعمل وهو موجود.. لكن أنا مش عاوز إن يكون في كدبة واحدة، إن المرء ليصدق ويتحرى الصدق حتى يكتب عند الله صديقا، وإن المرء ليكذب ويتحدى الكذب حتى يكتب عند الله كذابا».

وأردف «فيه مشاهد لأجهزة الأمن عبارة عن حجم قليل لجهد اتعمل في أصعب وقت ومازلنا لغاية دلوقتي، أتحدث عن وقائع خاصة بالدولة، الموضوع اللي حصل فيه تهديد مباشر للجيش اتعمل 3 مرات، إحداهما مع المشير الراحل حسين طنطاوي، واتقال البلد هتولع لو الانتخابات طلعت بنتيجة غير الرئيس مرسي الله يرحمه».

واستطرد «المرة التانية، لما خيرت الشاطر قال حرقنا مقرات الأمن الوطني ونقدر نحاكمهم محاكمة شعبية، المرة الثالثة كانت ليا شخصيا، قسما بجلال الله كانت 45 دقيقة، قالي هنقتل وهنجيب من كل حتة وهنولع الدنيا، وأشار بإصبعه إشارة إطلاق النار».

وتابع « رد الفعل على المسلسل عمل حالة من الاستنفرار الشديد من جانبهم.. ادعاء وتشويه وزيف.. بيعملوا كده.. 7 سنين لم اذكرهم مرة.. كنت اقول أهل الشر.. علشان ادي فرصة لأهل الشر ، بشكركم ولسه الدور ما خلصش، دور الدراما في بناء وعي حقيقي يأتي على أكتفاكم وعقولكم،هذه المسلسلات كانت كاشفة لذوق وعقل المصري، لم يختلف اثنان، اسمحولي اشكركم شكرا جزيلا».

ومن جانبه شكر الفنان كريم عبد العزيز الرئيس السيسي «كلنا بنشكر سيادتك نيابة عن زملائي، بنحمد ربنا إننا قدمنا ولو 1% من اللي قدمه العظماء، كلام سيادتك لينا أعلى وسام أخدناه شكرا يا فندم

تكريم أسر الشهداء

وكرم الرئيس عبد الفتاح السيسي، أسر شهداء الشرطة والقوات المسلحة والفرق الطبية، خلال أبناء الشهداء بعيد الفطر المبارك.

واحتضن الرئيس السيسي أحد أبناء الشهداء بعد بكائه خلال التكريم، ووجه له رسالة حول تضحيات الشهداء.

وأدى الرئيس عبد الفتاح السيسي، صلاة عيد الفطر المبارك في مسجد المشير طنطاوي.

وجلس أبناء الشهداء بجوار الرئيس السيسي خلال صلاة عيد الفطر المبارك، كما حرص على مصافحتهم عقب أداء الصلاة.

وحضر صلاة عيد الفطر المبارك، عدد من كبار رجال الدولة، بينهم الدكتور مصطفى مدبولي، رئيس مجلس الوزراء، وفضيلة الإمام الأكبر الدكتور أحمد الطيب، شيخ الأزهر، والدكتور محمد مختار جمعة، وزير الأوقاف.

الرئيس السيسي