آية عبدالحميد: الانفتاح على السوشيال ميديا خرب البيوت.. بقينا بنصور للناس حاجات متنفعش

أكدت الدكتورة آية عبدالحميد، استشاري العلاقات الأسرية والتربوية، أن انتشار السوشيال ميديا غير شكل العلاقات داخل البيوت، لكنه لا يُعد سببًا مباشرًا في انهيارها، موضحة أن المشكلة الحقيقية تكمن في طريقة استخدام الظهور الرقمي وحدود الخصوصية بين الأزواج، إلى جانب غياب التوافق الحقيقي بين الطرفين.

وقالت خلال لقائها مع الإعلامية نهال طايل في برنامج 'تفاصيل' المذاع على قناة 'صدى البلد': 'ظهور الانفتاح على السوشيال ميديا خربت البيوت، بقيت كل أسرار البيوت على السوشيال ميديا، ده بيخرب البيوت، والمشكلة إننا بقينا بنصور اللي الناس مكنتش بتشوفه، أسرار البيوت والحياة العادية بقت بتتشاف'.

وأضافت: 'المفروض الناس تشوف المتاح بس في إيفنت، في فرح، في إنترفيو،  لكن وأنا في المطبخ مش هطلع، وأنا لابسة البيجامة مش هطلع، وأنا بتخانق مع جوزي مش هطلع، وأنا بعلم ولادي مش هطلع، وأنا بعيط أو متضايقة مش هطلع'.

وأضافت: 'الدخليات دي هي اللي خربت البيوت، لكن مش كل ظهور بيخرب البيوت، بالعكس ممكن الظهور الإيجابي يبقى طبيعي ومفيش منه مشكلة'.